Սերժ Սարգսյանը սեպտեմբերի 3-ին պատրաստվում է հանդիպում ունենալ ՌԴ նախագահ Վլադիմիր Պուտինի հետ: Ինչպես հայտարարվել է նախագահի մամուլի գրասենյակից, այդ հանդիպման ընթացքում պետք է քննարկեն քաղաքական, առեւտրատնտեսական, էներգետիկ եւ հումանիտար ոլորտներում փոխգործակցությունը, ինչպես նաեւ կարող է քննարկվեն ԱՊՀ տարածքում ինտեգրացիոն գործընթացների եւ Հարավային Կովկասում անվտանգության և կայունության ապահովմանը վերաբերող հարցեր:
Այդ հանդիպման հետ կապված այսօր Aravot.am-ի հետ զրույցում ՀԱԿ-ի արտաքին հարաբերությունների հանձնաժողովի նախագահ Վլադիմիր Կարապետյանն իր մտահոգությունը հայտնեց. «Բավականին տեւական ժամանակ է, որ Հայաստանի իշխանությունները դիմել են ռուսական կողմին՝ այցի կազմակերպման համար եւ այդ այցը չէր ստացվում: Հայտնի է, որ ռուսական կողմի պատասխանն արտահայտվեց Պուտինի այցով՝ Ադրբեջան: Այս ամենը նպատակ ուներ ցույց տալու Հայաստանին դժգոհությունը՝ վերջին քայլերի նկատմամբ: Խոսքը վերաբերվում է ԵՄ-ի հետ ստորագրվելիք փաստաթղթին: Սերժ Սարգսյանին չի հաջողվել վարել այնպիսի քաղաքականություն, ինչպես վարում էին 20 տարվա ընթացքում ՀՀ նախագահները, արտգործնախարարությունները՝ փոխլրացման, բալանսավորման քաղաքականությունը: Եվ եթե մենք խորացնում էինք ԵՄ-ի, եվրոպական կառույցների հետ մեր հարաբերությունները, միեւնույն ժամանակ նույնչափ խորացնում էինք ՌԴ-ի հետ ռազմավարական գործընկերությունը: Ցավով պետք է նշեմ, որ այսօր կողմնորոշման խնդիր է դրված եւ ես ունեմ մեծ մտավախություն, որ այդ այցի եւ ռուսական կողմի համաձայնության հետեւում կանգնած է Սերժ Սարգսյանի համաձայնությունը շրջել եվրոպական ուղղուց Հայաստանը: Ես ունեմ այդ մտավախությունները: Եվ նույնիսկ, եթե նախաստորագրվի Ասոցացման համաձայնագիրը, ինչը նույնպես վտանգված է այսօր, ապա ստորագրման երաշխիքներ այս պահի դրությամբ չկան: Վստահ չեմ, որ հրապարակային հայտարարություններ կհնչեն, բայց այն, որ եվրոպական ինտեգրման վտանգներն այսօր առկա են, ես դա կանխազգում եմ, կան տվյալներ դրա մասին»:
Վլադիմիր Կարապետյանը նաեւ նշեց, որ ամեն բան պետք է արվի, որպեսզի Հայաստանը չշեղվի փոխլրացման եւ բալանսավորված քաղաքականության ուղուց:
Կարդացեք նաև
Հռիփսիմե ՋԵԲԵՋՅԱՆ
