Սեպտեմբերի 3-ին «Հայ օգնության ֆոնդի» Հայաստանի մասնաճյուղի գրասենյակում տեղի ունեցավ հանդիպում «Անուշ Մաթևոսյան կրթավճար» ծրագրի մրցույթի 23 սոցիալապես անապահով և բարձր առաջադիմություն ունեցող հաղթող ուսանողների հետ:
2013-2014 թթ․ ուսումնական տարվա համար 52 դիմումատուներից ընտրվել է 23-ը: Ընտրված ուսանողներից 10 միակողմանի ծնողազուրկ են, 6-ը ունեն հաշմանդամ ծնողներ, 2-ը ամուսնալուծված ծնողների երեխաներ են: «Հայ օգնության ֆոնդը» կաջակցի նրանց վճարելով ուսման վարձի 50 տոկոսը: Ուսանողները կարող են օգտվել կրթաթոշակից միայն բարձր առաջադիմության դեպքում:
Հայ օգնության ֆոնդի Հայաստանյան մասնաճյուղի փոխտնօրեն Մարգարիտ Փիլիպոսյանի խոսքերով կազմվել է հատուկ հանձնաժողով, որոնց ներկայացվել են դիմողների տվյալները.
«Շատ դժվար է ընտրել առաջին կուրսեցիներին, դպրոցի տվյալները խաբուսիկ կարող են լինել: Կատարել ենք հանրապետությունով մեկ տնայցեր: Եվ տվյալները փոխանցել ենք հանձնաժողովին, որն էլ ընտրել է ուսանողներին»:
Կարդացեք նաև
Ծրագրի ղեկավար Էդուարդ Կարապետյանը հորդորեց ուսանողներին լավ սովորել և հարցերի կամ խնդիրների դեպքում դիմել «Հայ օգնության ֆոնդին».
«Մեր ծրագիրը մրցակցային կրթական ծրագիր է, այսինքն՝ բոլոր նրանք, ովքեր 3-ներ կստանան դուրս կգան ծրագրից, բոլոր նրանք, ովքեր լավ կամ գերազանց կսովորեն հաջորդ կիսամյակում կստանան 75 % ուսման վարձ և բոլոր նրանք, ովքեր կանցնեն անվճար ուսման համակարգ ՀՕՖ-ի կողմից կստանան 80000 դրամ պարգև»:
Մերի Զաքարյանը ծնվել մեծացել է Եղեգնաձորում, ծանր սոցիալական պայմաններից դրդված դիմել է «Մաթևոսյան կրթավճար» ծրագրին և հաղթել է.
«Գերազանց ավարտել եմ դպրոցը, բարձր գնահատականներով՝ անվճարից մեկ-երկու բալ պակաս, ընդունվել եմ Երևանի պետական տնտեսագիտական համալսարանի Կառավարում ֆակուլտետը: Ծանր սոցիալական պայմանների պատճառով հնարավոր է, որ չհաճախեի համալսարան, եթե չդիմեի «Մաթևոսյան կրթավճարին»
«Մաթևոսյան կրթավճար» ծրագիրը 16 տարի է, ինչ աջակցում է բարձր առաջադիմություն ունեցող և սոցիալապես անապահով ուսանողներին: Ներկայումս ունի 88 ուսանող, որոնցից 23-ն սովորում են առաջին կուրսում:
Ամի Չիչակյան
