Կենտրոն եւ Նորք-Մարաշ վարչական շրջանների ընդհանուր իրավասության դատարանում, դատավոր Մխիթար Պապոյանի նախագահությամբ այսօր պետք է շարունակվեր բարձրաստիճան պաշտոնատար անձանց բնակարաններից, առանձնատներից գողություններ կատարած աղմկահարույց «Բանդայի գործով» հերթական դատական նիստը:
Պաշտպաններ Ստեփան Ոսկանյանն ու Սամվել Հովհաննիսյանը բացակայում էին դատական նիստից, իսկ ամբաստանյալ Արթուր Մանուկյանն էլ խնդրել էր դատարանից, որ իր շահերը ներկայացնի հանրային պաշտպանը:
Դատարանը կդիմի Հանրային պաշտպանի գրասենյակին, իսկ պաշտպաններ Սամվել Հովհաննիսյանի եւ Ստեփան Ոսկանյանի բացակայության հարգելի կամ անհարգելի լինելու հարցը քննության կառնի հոկտեմբերի 8-ին նշանակած դատական նիստում:
Ամբաստանյալ Արտուշ Հակոբյանի պաշտպան Հովիկ Արսենյանին դիմեցինք նախորդ նիստում հետազոտված ապացույցների հետ կապված հարցով, մասնավորապես, թե ինչպես է գնահատում այն ապացույցները, որոնք արդեն հետազոտվել են:
Կարդացեք նաև
Հ.Արսենյանն ասաց, որ ապացույցների հետազոտումից հետո կդիմեն միջնորդությամբ՝ դրանք անթույլատրելի ճանաչելու համար: Մասնավորապես, մեզ հետ զրույցում ամբաստանյալ Արտուշ Հակոբյանի պաշտպանն ասաց, որ մինչ Ամառանոցային 1-ին նրբանցքի 20 տան խուզարկելու թույլտվություն դատարանից ստանալը, ոստիկանության քրեական հետախուզության գլխավոր վարչության ՀՊՇ բաժնի քննիչը Ջիմի անունով շանն է օգտագործել, իր տրամադրության տակ է ունեցել նշված հասցեում շան կողմից հայտնաբերվածի մասին ակտը:
Քննիչը արձանագրել էր. «Օգտագործեցի ծառայական հետախույզ շանը զենք, զինամթերք եւ պայթուցիկների դեպքով»:
Ի՞նչ էր հայտնաբերել «օպերատիվ աշխատողը»:
Պարզվեց, նշված ձեռքբերված ապացույցը եղել է մեկ հատ «Մակարով» տեսակի ատրճանակ իր փամփշտակալով, մեկ հատ «ՏՏ» տեսակի ատրճանակ, իր փամփշտակալով, գազային ատրճանակ, , մեկ հատ ավտոմատ AK-740 երկու փամփշտակալով:
Ռուզան ՄԻՆԱՍՅԱՆ
