Չկա մի պատգամավոր, որ կասկածի տակ դնի ամիսներ առաջ Վերահսկիչ պալատի նախագահ Իշխան Զաքարյանի կողմից ներկայացրած պետբյուջեի չարաշահումների մասին փաստերը։ Այսօր խորհրդարանում, խոսելով ԲՀԿ խմբակցության անունից, հայտարարեց խմբակցության քարտուղար Նաիրա Զոհրաբյանը`Իշխան Զաքարյանին ՎՊ նախագահ նշանակելու հարցի քննարկման ժամանակ։ Բայց այն, որ կառավարությունը պետք է ոչ ադեկվատ արձագանքեր ՎՊ նախագահի հայտարարություններին, տիկին Զոհրաբյանը նաեւ բնական է համարում, քանի որ, ըստ նրա, եթե ադեկվատ արձագանքեր, ապա պիտի հայտարարեր, որ, այո, եղել է մեծ մասշտաբի գանձագողություն և հրաժարական տար։
Նաիրա Զոհրաբյանը վստահ է, որ Հայաստանում հնարավոր չէ ունենալ անկախ մարմին, որն ամբողջությամբ իր գործողություններն ինքնուրույն կիրականացներ. «Քանի դեռ մեր երկրում հաշված թվով մարդիկ են որոշում անմեղին և մեղավորին, չի կարող լինել բացարձակապես անկախ մարմին, որը կկարողանա իրականացնել Սահմանադրությամբ իրեն տրված լիազորություններն, ուստի ՎՊ-ից ավելին ակնկալել հնարավոր չէ: Սակայն ԲՀԿ-ն անվստահություն չի հայտնելու ՎՊ-ին, քանի որ այդկերպ մենք ուղղակիորեն կփակենք բյուջետային չարաշահումների վերաբերյալ բացահայտումներ անելու հնարավորությունը»։
Պատգամավորն ասաց, որ ԲՀԿ-ն հավատում է, որ այս ՎՊ-ն կարող է բոլոր բացահայտումներն իր ավարտին հասցնել, և օրինախախտները կպատժվեն. «Ի՞նչ եղավ բացահայտումներից հետո: Վարչապետը պարտադրեց բոլոր նախարարներին, որ աշակերտների նման արդարանան իրենց արած-չարածների համար։ Հարց է առաջանում՝ այդ ինչպե՞ս է, որ մարդիկ, ովքեր սերտ առնչություն են ունենում պետբյուջեի հետ, կարճ ժամանակում հարստանում են»: ԲՀԿ-ն գտնում է, որ անհրաժեշտ է համագործակցել ՎՊ-ի հետ, որպեսզի բյուջեից վերանան չարաշահումներն ու մսխումները. «ԲՀԿ-ի դիրքորոշումը ՎՊ նախագահի թեկնածությանը դրական է»։
Նելլի ԳՐԻԳՈՐՅԱՆ
