«Մենք առանց նախապայմանների հարաբերությունների կողմնակից ենք եւ գտնում ենք անթույլատրելի է Թուրքիայի կողմից Հայաստանի Հանրապետության շրջափակումը եւ նախապայմանների առաջ քաշումը»,- դեկտեմբերի 12-ին ՀՀԿ գործադիր մարմնի նիստից հետո հայտարարեց ՀՀԿ մամլո խոսնակ Էդուարդ Շարմազանովը:
Նրա խոսքերով՝ հայ-թուրքական հարաբերություններում առաջընթաց կլինի միայն այն դեպքում, եթե թուրքական կողմը համաձայնվի առանց նախապայմանների ապաշրջափակել Հայաստանի հետ սահմանը եւ եթե պատրաստ լինեն չկապել այս հարցը Լեռնային Ղարաբաղի կարգավորման գործընթացի հետ.
«Խաղաղության մասին կոչեր անելու փոխարեն՝ շատ ավելի օբյեկտիվ կլիներ, եթե մեր թուրք գործընկերները անեին այն քայլերը, ինչ նրանցից սպասում է միջազգային հանրությունը»:
Նա չի կարծում, որ Թուրքիայի արտաքին գործերի նախարար Ահմեդ Դավութօղլու այցը կնպաստի հայ-թուրքական հարաբերությունների բարելավմանը, քանի որ պաշտոնական Անկարան պատրաստ չէ առանց նախապայմանների հարաբերություններին.
Կարդացեք նաև
«Երբ որ իրենք ասում են՝ իրենք պատրաստ են շատ ջանք թափել, որպեսզի տարածաշրջանում հաստատվի խաղաղություն եւ կայունություն, շատ ջանք թափել անհրաժեշտ չէ, անհրաժեշտ է անել տարրական մի քանի քայլ»:
Շարմազանովի խոսքերով, ըստ էության, հայ-թուրքական հարաբերություններում ոչինչ չի փոխվել եւ գնդակը դեռ Թուրքիայի կիսադաշտում է:
Ամի ՉԻՉԱԿՅԱՆ
