«Դեկտեմբերի 15-ին Հայաստանի փոխարտգործնախարար Շավարշ Քոչարյանի գլխավորած պատվիրակության այցն Իրան պետք է կապել Ռուսաստանի արտգործնախարար Սերգեյ Լավրովի գլխավորած պատվիրակության` Թեհրան կատարած այցի հետ, որովհետեւ երկու դեպքում էլ ԱԳ ներկայացուցիչներն են մեկնել Իրան: Ռուսաստանը հանդիսանում է Մաքսային միության առաջատար երկիր, իսկ Հայաստանը ցանկություն է հայտնել միանալ այդ միությանը, ուստի հայկական եւ ռուսական պատվիրակությունների այցերի տրամաբանությունը պարզ է»,- այսօր «Արմատ» ակումբում ասաց իրանագետ Ռուդիկ Յարալյանը՝ խոսելով տարածաշրջանային, տնտեսական, ինտեգրացիոն գործընթացների մասին:
Ռուդիկ Յարալյանը գտնում է, որ Իրանը ռուսական կողմի հետ քննարկել են միջուկային էներգետիկայի, ռազմատեխնիկական ոլորտում համագործակցության ու առեւտրաշրջանառության հետ կապված հարցեր, իսկ հայկական պատվիրակության հետ բանակցությունների ժամանակ իրանական կողմը հայտարարել է, թե պատրաստ է ապահովել Պարսից ծոցի եւ Կասպյան երկրների միջեւ առևտրաշրջանառությունը: «Իրանական կողմը բավականին շահագրգռված է Մաքսային միության հետ համագործակցության հարցում: Եվ այդ առումով Իրանի դերը կրկնակի անգամ արժեւորվում է»,- վստահեցնում է Ռուդիկ Յարալյանը, շարունակելով, որ Իրանը ուղիղ առեւտրաշրջանառության հնարավորություն է ստանում Մաքսային միության անդամ երկրների հետ ու դառնում է կապող օղակ Մաքսային միության երկրների եւ այլ պետությունների միջեւ առևտրաշրջանառության համար:
Ռուդիկ Յարալյանը նաեւ գտնում ` Իրանը կարող է այլընտրանք հանդիսանալ Վրաստանին:
Ռուդիկ Յարալյանը համոզված է, որ Իրանը չի անդամակցի Մաքսային միությանը, որովհետեւ, ըստ նրա, դժվար թե իր գործողությունները կաշկանդի` ընդունելով Մաքսային միության օրենսդրությունը:
Կարդացեք նաև
Խոսելով Հայաստանին էժան գազ մատակարարելու մասին շրջանառվող լուրերից, Ռուդիկ Յարալյանը ասաց, որ Իրանի դեսպանը դեռ չի ասել, որ Իրանը պատրաստ է 100 դոլարով գազ մատակարարել Հայաստանին, բացի այդ, նա գտնում է, որ «Գազպրոմի» առաջարկած գինն ավելի ձեռնտու է, քան Իրանինը, որովհետեւ Իրանն այլ պետությունների գազը վաճառում է համաշխարհային գներով, այսինքն` 400 դոլարով:
Եվա ՀԱԿՈԲՅԱՆ
