Այսօր Հայաստանի երիտասարդ կանանց ասոցիացիան «Կանանց սոցիալ-տնտեսական հզորացում Հայաստանում» ծրագրի շրջանակներում «Կանանց տնտեսական հզորացման հնարավորությունների եւ համայնքների տնտեսական զարգացման միջեւ կապը» թեմայով քննարկում էր հրավիրել:
Ծրագրի շրջանակներում Լոռու մարզի քաղաքային ու գյուղական համայնքների կանայք հնարավորություն ունեն ակտիվորեն ներգրավվելու համայնքների սոցիալ-տնտեսական զարգացման ծրագրերում, մասնակցելու տարաբնույթ դասընթացների, ուսուցողական ծրագրերի, ինչպես նաեւ իրենց գաղափարները կյանքի կոչելու դրամաշնորհային մրցույթներում:
Ծրագիրը իրականանում է բացառապես Լոռու մարզում եւ սկսվել է այս տարվա մայիս ամսից, տեւողությունը երեք տարի է, ֆինանսական աջակցությունը տրամադրում է Եվրամիությունը: Ծրագրի գործընկերներն են Լոռու մարզպետարանը, Վանաձորի քաղաքապետարանը, ինչպես նաեւ CISP իտալական կազմակերպությունը:
Կարդացեք նաև
«Ցանկացած երկրի հիմքը տնտեսությունն է, այսօր մեր տնտեսությունը, ցավոք սրտի, զարգացած չէ, բնականաբար, մեր երկրի հիմքերն այդքան էլ ամուր չեն: Մենք խնդիր ունենք եւ փորձում ենք այս եւ մյուս ծրագրերի միջոցով կանանց ներուժը բարձրացնելով խթանել, որպեսզի տնտեսությունը զարգանա, ու մեր երկրի հիմքերը, բնականաբար, ավելի ամրանան»,- իր խոսքում նշեց Հայաստանի երիտասարդ կանանց ասոցիացիայի նախագահ Լիլիթ Ասատրյանը:
Նա նկատեց, որ թեեւ Լոռու մարզը սոցիալ-տնտեսական վատ վիճակում է գտնվում, այնուամենայնիվ մարզի ձեռներեց կանայք շատ ակտիվ են:
«Կին ձեռներեցները Լոռու մարզում բավական ակտիվ դիրքեր են գրավում: Մեր խնդիրը նաեւ դա է, որ մենք փորձենք բացահայտել մարզում արդեն իսկ գործունեություն ծավալող կանանց, կին ձեռներեցներին, ովքեր կարող են, ինչու չէ, մի կողմից ոգեւորել մյուս կանանց` խիզախություն ձեռք բերելու սկսել իրենց գործը, եւ մյուս կողմից էլ իրենք էլ են խրախուսվում»,-ասաց Լիլիթ Ասատրյանը:
Լոռու մարզպետ Արթուր Նալբանդյանը եւս կարեւորեց ծրագրի ծավալած գործունեությունը մարզում` նկատելով, որ ծրագիրը մարզում մեծ դեր ու նշանակություն ունի:
«Լոռու մարզում սոցիալական վիճակը մի փոքր ավելի ծանր է, քան մնացած մարզերում, եւ այդ ծրագիրը Լոռու մարզում իրականացնելը ես շատ եմ կարեւորում, համոզված եմ, որ այն մեր մարզում, մեծ դեր ու նշանակություն ունի, եւ ես վստահ եմ, որ կանանց ակտիվությունը ինչ-որ տեղ նաեւ շարժիչ ուժ կհանդիսանա մեր տնտեսության զարգացման համար»,-եզրափակեց Արթուր Նալբանդյանը:
Անուշ ԲՈՒԼՂԱԴԱՐՅԱՆ
