«Ինձ համար չափանիշ չէ քաղաքական գործչի ժամանակավոր լռությունը հատկապես որեւէ ռազմավարական հարցի առնչությամբ: Սա մարտավարական խնդիր է, որն իր պահանջներն ունի: Ինձ համար կտրականապես անընդունելի է բացահայտ հանցագործների եւ նրանց լաքեյների կողմից ձեւավորված այն ստահոդ կարծիքը, թե իբր Լեւոն Տեր-Պետրոսյանը եւս կարիք ունի «ռեաբիլիտացիայի»: Այո, եթե մարդ այնքան տխմար է, որ հավատում է ֆիզիկայի օրենքներին հակասող պնդմանը, թե Լեւոնի իշխանության օրոք էլեկտրականությունը հողահարվում էր, որպեսզի ժողովուրդը զրկվի էներգիայից, կամ լուրջ էր ընդունում այդ իշխանության կողմից «մազութ լափելու» հեքիաթը եւ այդ կարգի այլ կեղծ մեղադրանքները, ապա անօգուտ է նրան մտավոր «ռեաբիլիտացիայի» ենթարկելու մասին մտածելը: Բայցեւ փաստ է, որ Ձեր ասած «երեք նախագահների» մեջ «ռեաբիլիտացիայի» ենթակա մարդ չկա` մեկը կարիք չունի, իսկ երկուսը ծանր հանցագործներ են»,- «Առավոտի» հետ զրույցում պատասխանելով հարցին` ՀՀ երեք նախագահների կեցվածքը ՄՄ-ին անդամակցության հարցում կարծես չի տարբերվում միմյանցից. նրանցից որեւէ մեկի «վերակենդանացումը» ի՞նչ կփոխի, ասաց ՀՀՇ վարչության նախկին անդամ Երջանիկ Աբգարյանը:
«Առավոտ» օրաթերթ
