«Այսօր ամբողջ աշխարհում, այդ թվում նաև Հայաստանում, ընթանում է պայքար ոչ ինֆեկցիոն և ոչ վարակիչ հիվանդությունների դեմ: Մենք ուզում ենք 2014 թվականին կրկնապատկենք այն, ինչ արել ենք»,- այսօր ՀՀ առողջապահության նախարարությունում ասաց ՀՀ առողջապահության նախարարի տեղակալ Սերգեյ Խաչատրյանը:
Ասուլիսին ներկա էին նաև ՀՀ ԱՆ առողջապահության ազգային ինստիտուտի տնօրենի տեղակալ Ալեքսանդր Բազարչյանը, ՀՀ ԱՆ աշխատակազմի հանրային առողջապահության բաժնի պետ Լուսինե Քոչարյանը և հեռուստամեկնաբան Դավիթ Պետրոսյանը: Նրանք խոսեցին առողջապահության նախարարության 2014թ.-ի գերակա ուղղություն հայտարարված առողջ ապրելակերպի ծրագրերի մասին:
«Աշխարհի բոլոր երկրները կիրառում են մեթոդներ ոչ վարակիչ հիվանդությունների դեմ, քարոզում են առողջ ապրելակերպ, քանի որ սա քիչ ծախսատար, բայց արդյունավետ միջոց է: Մենք մշակել ենք առողջ ապրելակերպի ռազմավարական ծրագիր, որը ունենալու է օրենսդրական բարեփոխումների բաժին: Այն ուղղված է լինելու գովազդի ՀՀ օրենքի փոփոխություններին, ալկոհոլի դեմ պայքարելուն, արագ սննդին, իրականացնելու ենք միջոցառումներ, որոնք սահմանափակելու են ՀՀ տարածքում արագ սննդի և գազավորված ըմպելիքների վաճառքը հատկապես կրթական հաստատություններում: 2-րդ բաժինը կրթական միջոցառումների բաժինն է, իսկ երրորդը ուղղված կլինի դպրոցականներին, քանի որ կարևոր է աշխատել հենց դեռահասների հետ: Ծրագիրը կներկայացվի կառավարությունում և ընդունվելուց հետո կիրականացվի»,- ասաց Լ. Քոչարյանը:
Բանախոսներն ասացին, որ առողջ ապրելակերպը ներառում է տարիքին համապատասխան ֆիզիկական ակտիվությունը, առողջ և անվտանգ սննդի օգտագործումը, ծխախոտի օգտագործման և ալկոհոլի չարաշահման նվազումը և այս սովորույթները պետք է ձևավորվեն վաղ հասակում:
Կարդացեք նաև
Քրիստինե ԳՐԻԳՈՐՅԱՆ
