«Ժողովրդի համբերության բաժակը լցվել է: Այս փուլում նստել կուսակցական գրասենյակներում, քննադատել մեկը մյուսին, ֆեյսբուքյան պատերազմներ տանել՝ սին գործունեություն է: Ինձ բնավ պետք չէ ոչ ռեյտինգ, ոչ աթոռ: Բայց ինձ պետք է, որ տեսնեմ Հայաստանը, որտեղ լինում են նորմալ ընտրություններ, որ ընդհանրապես փոխվում է իշխանությունը»,- այսօր «Մեդիա կենտրոնում» ասաց «Ժառանգության» առաջնորդ Րաֆֆի Հովհաննիսյանը:
Նա անդրադարձավ առաջին նախագահ Լեւոն Տեր-Պետրոսյանի՝ Մարտի 1-ի հանրահավաքին. «Պարոն Տեր-Պետրոսյանը ծրագրային ելույթ ունեցավ: Ճիշտ բաներ ասաց, բայց նաեւ որոշ բաներ ասաց, որոնց հետ ես համաձայն չէի: Առաջինը՝ ասաց, որ մնացած բոլորը դեմ են ամբողջական իշխանափոխության, դրա համար իրենք ավելի զիջող են այդ հարցում: Դա ճիշտ չէ: Հենց «Ժառանգությունն» է, որ միշտ եղել է այդ շատ նորմալ, արմատական դիրքորոշման գլխին: Եվ երկրորդը՝ նա ասաց, որ Մաքսային միությունը անշրջելի է: Ես չեմ համարում, որ անշրջելի է: Ոչ մի միության Հայաստանի անդամագրումը անշրջելի չէ»:
Րաֆֆի Հովհաննիսյանն ասաց, որ եթե 4 ուժերի լիդերների հանդիպումը կայանա, ինքը կներկայացնի իր տեսակետը եւ կասի, որ ոչ մի բան անշրջելի չէ. «Որովհետեւ այս ճանապարհը, որ Հայաստանը բռնել է՝ հայ-թուրքական արձանագրություններից մինչեւ կեսգիշերյան Մաքսային միություն, տանելու է ոչ միայն տնտեսական անկման, այլ նաեւ՝ մեր ինքնիշխանության, անկախության կորստի: Դրա մեջ թող ոչ մեկը հակառուսականություն չտեսնի, դա բխում է Հայաստանի շահերից»:
Հռիփսիմե ՋԵԲԵՋՅԱՆ
