ԼՂՀ իշխանությունները հաստատակամ էին 2015 թվականի հունվարի մեկից Հայաստանում մեծ աղմուկ հանած համակարգն առանց տառ անգամ փոխելու Արցախում ներդնելու գործում։ Սահմանադրական դատարանի որոշումը, սակայն, փոխեց խաղի կանոնները։ Հետաքրքիր է, թե ինչպես կվարվի Արցախի օրենսդիր մարմինն այս դեպքում։
«ՉԻ»-ին հաջողվել է խոսել բոլոր խմբակցությունների պատգամավորների եւ անկախ պատգամավորներից մեկի հետ եւ պարզել նրանց տեսակետներն ու կանխատեսումները։
Անկախ պատգամավոր Վահան Բադասյանը «ՉԻ»-ի թղթակցին նախ պատմեց, թե կուտակայինի մասին օրենքի նախագիծն ինչ փուլում է գտնվում։
«Այստեղ փոքր-ինչ այլ կերպ է, խորհրդարանը պրոֆեսիոնալ չէ: Կառավարությունն իր նախաձեռնությամբ օրինագիծն ուղարկում է ԱԺ, համապատասխան գլխադասային հանձնաժողովներն ու խմբակցությունները քննարկում են այն, ապա օրինագիծը բերվում է լիագումար նիստ»,- մանրամասնեց պատգամավորը՝ տեղեկացնելով, որ այժմ օրենքի նախագիծը գտնվում է հանձնաժողովների քննարկման փուլում, իսկ հունիսին նախատեսվում է այն դնել մեծ օրակարգ։
Կարդացեք նաև
Վահան Բադասյանի կարծիքով, սակայն, ՍԴ-ի որոշումից հետո այն չի բերվի օրակարգ։ «Միշտ դեմ եմ եղել այդ համակարգին, քանի որ այն իսկապես հակասահմանադրական եմ համարում։ Դա պարզապես նշանակում է մտնել քաղաքացու գրպանը, իսկ հիմնադրամներն էլ ոչ այլ ինչ են, քան բիզնես կենտրոններ։ Միեւնույն ժամանակ բավարարված չեմ ՍԴ-ի որոշումով։ Կարծում եմ՝ ՍԴ-ն պետք է առհասարակ չեղյալ համարեր այդ օրենքը, այլ ոչ թե այն խմբագրելու ուղարկեր»,- նկատեց անկախ պատգամավորը՝ վստահ լինելով, որ համակարգի ներդրման դեպքում թոշակի անցած քաղաքացիները չեն կարողանալու ետ ստանալ կուտակած գումարները։ Նրա խոսքով՝ քաղաքացիները չեն գտնելու ո՛չ Սերժ Սարգսյանին, ո՛չ Տիգրան Սարգսյանին, ո՛չ ԼՂՀ նախագահ Բակո Սահակյանին, ո՛չ էլ ԼՂՀ վարչապետ Արա Հարությունյանին։ Նրանց, ովքեր այսօր երաշխավորում են ապահով ծերություն։
Լիլիթ ԼԱԼԱՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
