Քաղտեխնոլոգ Կարեն Քոչարյանը չի բացառում, որ վարչապետ Տիգրան Սարգսյանի հրաժարականից հետո ԲՀԿ-ն կրկին կոալիցիա վերադառնա:
«Պարզ է, որ եթե վարչապետը հրաժարական է տվել մեկ ամիս շուտ, քան ապրիլի 28-ը, երբ չորս քաղաքական ուժերը պատրաստվում էին կառավարությանն անվստահություն հայտնել, հետեւաբար վարչապետը կլինի ոչ թե ԲՀԿ-ից, ՀԱԿ-ից, ՀՅԴ-ից, այլ կլինի ՀՀԿ-ի թեկնածու, դա չի նշանակում, որ կլինի ՀՀԿ անդամ, բայց դա անպայման կլինի ՀՀԿ-ի թեկնածու: Հակառակ դեպքում կդիտվի որպես ճնշման տակ արված քայլ, որպես պարտություն»,- Aravot.am-ին ասաց պարոն Քոչարյանը:
Նրա խոսքով, ՀՀԿ-ն կշարունակի պնդել, որ վարչապետի փոփոխությունը կապ չունի քառյակի նախաձեռնության կամ ճնշումների հետ, իսկ քառյակն էլ կշարունակի պնդել, որ իրենց ճնշման տակ է եղել. «Իրականում մի քանի տարբերակ կա: Եկեք չմոռանանք, որ ՍԴ-ի որոշումը, որը հակասահմանադրական հանեց կենսաթոշակային պարտադիր կուտակային օրենքի որոշակի եզրույթներ, մեծ հարված էր կառավարությանը, որովհետեւ դա կառավարության համար հիմնական բազային օրենքներից էր: Այս առումով, եթե ճնշումներին նայենք, այստեղ ավելի շատ «Դեմ եմ»-ի ճնշումներն էին, քան քառյակինը: Հաջորդը՝ համաշխարհային միտումներն են: Հետաքրքիր զարգացումներ են կատարվել: Հետխորհրդային երկրներում վերջին երկու- երեք օրը մի քանի կառավարություն է գնացել՝ Ղրղըզստանում, Ղազախստանում: Ինչ-որ գործընթացներ են գնում, մենք էլ դրա մի մասն ենք, եթե հայտարարել ենք, որ մտնում ենք Մաքսային միություն»:
Պարոն Քոչարյանը չցանկացավ կանխատեսումներ անել վարչապետի հավանական թեկնածուների վերաբերյալ, բայց ասաց, որ ամենաքիչ հավանական թեկնածուն ՀՀ երկրորդ նախագահ Ռոբերտ Քոչարյանին է համարում:
Կարդացեք նաև
Արփինե ՍԻՄՈՆՅԱՆ
Լուսանկարը՝ panorama.am-ի
Աստված չանի։