Երևանի Տարաս Շևչենկոյի անվ. թիվ 42 դպրոցում այսօր նշվեց ուկրաինացի մեծ բանաստեղծի՝ Տ. Շևչենկոյի 200-ամյակը: Միջոցառմանը մասնակցում էին նաև ՀՀ կրթության և գիտության նախարար Արմեն Աշոտյանը և ՀՀ-ում Ուկրաինայի դեսպանատան ներկայացուցիչներ:
«Ես շատ ուրախ եմ, որ մենք ունենք ուկրաինացի մեծ գրող և հրապարակախոս Շևչենկոյի անվան ավագ դպրոց, և կարծում եմ, որ այս դպրոցի առկայությունն ու մեր այսօրվա միջոցառումը վկայությունն են այն բանի, որ հայ-ուկրաինական հարաբերություններին իրականում ոչինչ չի սպառնում, որովհետև այդ հարաբերությունները վեր են քաղաքական տարաբնույթ գնահատականներից, այդ հարաբերությունները հարյուրամյակների պատմություն ունեն և դրանք լոկ անցյալ չեն, ոչ էլ այսօրվա մի փոքր մառախլապատ քաղաքական ներկան են: Այդ հարաբերությունները, իրականում, ապագան են, որովհետև որքան էլ քաղաքական տարաբնույթ գնահատականներ և խնդիրներ առաջանան, միևնույն է, մեր երկու ժողովուրդների միջև երբեք չի եղել, չկա և չի լինի որևէ խոչընդոտ, որը ստվեր կնետի հայ-ուկրաինական բարեկամության վրա: Ուկրաինայի ժողովուրդն արժանի է խաղաղության և բարեկեցության»,- միջոցառման հանդիսավոր բացման խոսքում ասաց Արմեն Աշոտյանը:
Նշենք, որ դպրոցում այսօր բացվեց նաև Տ. Շևչենկոյին նվիրված դահլիճ-թանգարանը, որի գոյությունը կարևորելով հատկապես աշակերտների համար՝ դպրոցի տնօրեն Էլեոնորա Թումանյանն ասաց. «Դպրոցն արդեն 70 տարի է, ինչ կրում է Տարաս Շևչենկոյի անունը, և, չնայած նրան, որ դպրոցում կային մեծ արվեստագետին վերաբերող որոշակի պատառիկներ՝ դիմանկարներ, քանդակներ, հարուստ գրականություն և այլն, բայց, այնուամենայնիվ, չկար մի անկյուն, որը պատշաճ ձևով կլուսաբաներ նրա կյանքն ու ստեղծագործությունը: Եվ ես շատ ուրախ եմ, որ այս դահլիճ-թանգարանն այսօր արդեն տալիս է այդ հնարավորությունը»:
Հայաստանում Ուկրաինայի դեսպան Ի. Կուխտայի ներկայացուցիչ Իգոր Ռոմանն էլ, կարևորելով այսպիսի միջոցառումները, ասաց, որ դրանք մեծապես նպաստում են հայ-ուկրաինական հարաբերությունների զարգացմանը, և որ սերունդները երբեք չեն մոռանա երկու եղբայրական ժողովուրդների բարեկամությունը:
Կարդացեք նաև
Սիրանուշ ՀԱՅՐԱՊԵՏՅԱՆ