Կոտայքի մարզի ընդհանուր իրավասության դատարանի դատավոր Վաղինակ Մկրտչյանը դատական նիստերի դահլիճից դուրս հրավիրեց Վարդան Պետրոսյանի ավտովթարի գործով տուժող Հայկ Հակոբյանին:
Դատավորը մինչ այդ նախազգուշացրել էր տուժողին, տեղից վիրավորական արտահայտություն անելու համար:
Ամեն ինչ սկսվեց պաշտպան Նիկոլայ Բաղդասարյանի միջնորդություններից:
Պաշտպանը միջնորդեց, որպեսզի անթույլատրելի ճանաչվի Վարդան Պետրոսյանին որպես կասկածյալի հարցաքննելու եւ ապա` մեղադրյալ ներգրավվելու մասին արձանագրությունները: Պաշտպանն ասաց, որ գործում առկա է երկու արձանագրություն` մեղադրյալ ներգրավվելու մասին: Տուժողը ռեպլիկի կարգով ասաց.
Կարդացեք նաև
-Բա որ երկու հոգու է սպանել:
Տուժող Հայկ Հակոբյանը միջնորդության հետ կապված իր դիրքորոշումն արտահայտելու համար վեր կացավ, ու ասաց. «Եկել ենք, մեկը թատրոն է խաղում, մեկը», իսկ մյուս տուժողն էլ`Արթուր Հակոբյանն ասաց. «Ներվերս չի հերիքում, իզուր եմ եկել, ինչքան կարող է»:
Երբ պաշտպան Նիկոլայ Բաղդասարյանը միջնորդություն արեց երեք անձանց`Տիգրան Խաչատրյանին, Հրանտ Վարդանյանին, Տիգրան Պետրոսյանին դատակոչել դատարան, որպես վկա, հրապարակելով որոշ տեղեկություններ, հիմնավորելու համար, թե ինչու են նրանք անհրաժեշտ դատարան գալու համար, տուժող Հայկ Հակոբյանը ասաց.«Էլի իր էշն է քշում, լրբի լակոտը»: Դատավորը հեռացրեց տուժողին, իսկ դատական նիստերի դահլիճից էլ Սերգեյ Սիմոնյան ներկայացած մեկին, որը ետեւի շարքերից բղավեց. «Էս ինչ շոու եք սարքել»:
Դատարանը զգուշացրեց դատավարության մասնակիցներին միմյանց նկատմամբ վիրավորական արտահայտություններ չանել, հետեւել դատավարության կարգին:
Դատարանը բավարարեց Վարդան Պետրոսյանի պաշտպանի միջնորդությունը, երեք անձանց դատարան կանչելու համար, ինչին կողմ եղան մեղադրողն ու տուժողները:
Ի դեպ, ավտովթարի օրը նրանք ավտոմեքենայից դուրս են բերել Վարդան Պետրոսյանին, եւ ցուցմունք էին տվել, որ նրանից եւ հագուստներից խմիչքի հոտ չեն զգացել:
Դատարանը հետաձգեց Նիկոլայ Բաղդասարյանի մի միջնորդությունը, որը վերաբերում էր այս գործով քաղհայցվոր ճանաչված գյուղնախարարության ինչ-որ կազմակերպությանը: Երկու միլիոն վեցհարյուր հազար դրամի հայց է ներկայացվել դատարան, արգելանք է դրվել Պետրոսյանի գույքի վրա: Ըստ պաշտպանի Պետրոսյանի ավտոմեքենան ապահովագրված է մի ընկերության կողմից եւ եթե պարզվի, ով է մեղավոր հայցվորի ասած հայցի շրջանակներում, ապահովագրական ընկերությունը պետք է հատուցեր գումարը:
Վարդան Պետրոսյանը, երբ իր պաշտպանը վիճարկում էր քննիչ Հայկարամ Հակոբյանի` որպես կասկածյալ հարցաքննության արձանագրությունը, հայտնեց, որ դեպքը համարել է դժբախտ պատահար, մեծ ողբերգություն, որ առանց փաստաբանի փորձել են իրեն որպես կասկածյալի հարցաքննել, որ ինքը չի ստորագրել այդ արձանագրության տակ:
Ըստ Վ.Պետրոսյանի, քննիչն ասել է` ստորագրեք, կտամ բլանկը, իսկ երբ բլանկը չի տրվել ինքը գրել է` ես ինձ մեղավոր չեմ ճանաչում:
Մեղադրողը փորձեց հակադարձել, թե Վարդան Պետրոսյանն «էն լացակումած իրավիճակն» է ներկայացնում, մինչդեռ քննիչը, երբ գնացել է նրան հարցաքննելու, բուժկենտրոնի փաստաթղթի համաձայն, նա ի վիճակի չի եղել ցուցմունք տալու:
Դատավոր Վաղինակ Մկրտչյանը հիմա էլ զգուշացրեց մեղադրողին:
Դատավորը լրացուցիչ հարցրեց մեղադրող Արթուր Սարգսյանին, թե չի՞ հարցաքննվել որպես կասկածյալ Վարդան Պետրոսյանը, հետեւեց`ոչ:
Ի դեպ, Նիկոլայ Բաղդասարյանն ասաց, որ որպես կասկածյալ իր պաշտպանյալը որեւէ տեղ չի ստորագրել, քանի որ քննիչը թույլ չի տվել, որ նա ավարտի իր ցուցմունքը:
Ավելին, ըստ պաշտպանի, քննիչը արձանագրել էր, որ թույլ չի տվել, որ պաշտպանն իր դիտողությունն անի արձանագրության մեջ. «Գրիչն իմ ձեռից հարկադրաբար վերցրեց»:
Քննիչն այդ կապակցությամբ արձանագրել էր. «Իմ կողմից թույլ չտրվեց, որ պաշտպանը շարունակի, քանի որ Վարդան Պետրոսյանը ցուցմունք չի տվել»:
Պաշտպանի եւ Վարդան Պետրոսյանի ստորագրությունները բացակայել են, ինչը կոպիտ խախտում էր:
Պաշտպանն ասաց, որ քննիչի դեմ բողոք է բերվել դատախազին, սակայն դատախազը քննիչի գործողություններն օրինաչափ է համարել:
Ռուզան ՄԻՆԱՍՅԱՆ
