2013թ. մայիսի 15-ին Նոյեմբերյանի զորամասում Լյուքս Ստեփանյանի սպանության գործով դատավարության ապրիլի 25-ի նիստում պաշտպանական կողմի միջնորդությամբ դատակոչված դատական փորձագետներ Ա. Համբարձումյանը, Լ. Թովմասյանը եւ Ա. Բաբայանը պատասխանեցին ամբաստանյալ Դավիթ Խաչատրյանի պաշտպան Երեմ Սարգսյանի բազմաթիվ հարցերին: Հարցերը վերաբերում էին դեպքի հանգամանքներին,կրակոցի ուղղությանը, Լյուքս Ստեփանյանի գլխի դիրքին, նրա ստացած մահացու վնասվածքին: Դավիթ Խաչատրյանի կրակոցից հետո գնդակը սկզբում խոցել է Հրաչյա Սարգսյանին, ապա` մահացու վիրավորել Լյուքս Ստեփանյանին: Պաշտպան Երեմ Սարգսյանը գնդակի հետագիծը փորձագետներից պարզելու, Լյուքսի գլխի վնասվածքը ցուցադրելու համար օգտագործում էր գլխի պատկերով սխեմա եւ քրեական գործի մեջ առկա, դատական փորձաքննության լուսանկար: Տուժողի իրավահաջորդ, Լյուքս Ստեփանյանի մոր` տիկին Լուիզայի աչքերն արցունքոտված էին:
Պաշտպան Ե. Սարգսյանի հարցերից հետո Լյուքսի հայրը` Իշխան Ստեփանյանը հունից դուրս եկավ: Նա մոտեցավ Երեմ Սարգսյանին եւ գոչեց. «Մեռնեմ քեզի, նկարը քիչ ցույց տուր կնոջս, ցույց մի տուր, ամոթ է, ամոթ, հերիք եղավ, տղաս չկա, Լյուքսը, Լյուքսը, Լյուքսը….տղաս չկա, հիմար լակոտ, չումո, տղաս չկա, որձակ է դարձել»: Նրա խոսքը համեմված էր սեռական բնույթի հայհոյանքներով: Դատական կարգադրիչները նրան դատարանի դահլիճից դուրս հանեցին: Դատավոր Զոյա Զաքինյանը դատական կարգադրիչներին հրահանգեց, որ նրանք արգելեն դատական հաջորդ նիստին Իշխան Ստեփանյանի ներկայությունը: Վերջինիս հարազատներից մեկը եւս դատական սանկցիայով հեռացվեց դահլիճից:
Կարդացեք նաև
Ոսկան ՍԱՐԳՍՅԱՆ
