Հայաստանի ուսանողական մարզական 15-րդ խաղերի շրջանակներում անցկացվեցին վոլեյբոլի տղաների առաջնության եզրափակիչ խաղերը։ Այս մարզաձևում ուսանողական խաղերին ուժերն էին չափում 11 բուհի թիմեր։ 3-րդ տեղի համար ուժերը չափեցին Հայ-ռուսական (Սլավոնական) համալսարանի և Հայաստանի պետական Ագրարային համալսարանի թիմերը: Թեժ պայքարի արդյունքում 3:0 հաշվով 3-րդ տեղը զբաղեցրեց Ագրարային համալսարանի թիմը: 1-ին և 2-րդ տեղերի համար պայքարեցին ԵՊՀ և Ճարտարագիտական համալսարանի թիմերը։
3:0 հաշվով 1-ին տեղը գրավեց ԵՊՀ թիմը, 1-ին տեղում էր Ճարտարագիտական համալսարանի թիմը: Նշենք, որ Հայաստանի ուսանողական մարզական առաջնության շրջանակներում անցկացվելու է 14 առաջնություն՝ 11 մարզաձևից։ Խաղերին ընդհանուր առմամբ կմասնակցեն 20 բուհի շուրջ 3000 ուսանող։ Հաջորդ ծրագրված մրցաշարը տեղի կունենա մայիսի 1-ին Խուլ ու համրերի համալիրում, որտեղ ուժերը կչափեն ուսանող ձյուդոիստները։ Հայաստանի ուսանողական մարզական խաղերը կազմակերպիչներն են ՀՀ կրթության և գիտության նախարարությունը, Հայաստանի ուսանողական մարզական ֆեդերացիան և Հայաստանի երիտասարդական հիմնադրամը։
Հայաստանի ուսանողական ֆեդերացիայի նախագահության անդամ Հովհաննես Գաբրիելյանը, գնահատելով ուսանողական թիմերի մարզական պատրաստվածության ընդհանուր վիճակը նշեց. «Այս տարի նախորդ տարվա համեմատ թիմերի թե´ ակտիվությունը, թե´ մարզական պատրաստվածության աստիճանն ավելի բարձր էր: Մրցաշարի ընթացքում յուրաքանչյուր միավորի համար գրանցվում էր լավ խաղարկում, թեժ պայքար ու մրցակցություն»: Տեղեկացնենք նաև, որ Ֆիզիկական կուլտուրայի հայկական պետական ինստիտուտի թիմը առաջիկայում սուպեր եզրափակիչում կխաղա եզրափակիչում հաղթած՝ Ճարտարագիտականի թիմի հետ՝ սուպեր գավաթի համար:
Հայաստանի երիտասարդական հիմնադրամի
հասարակայնության հետ կապերի ծառայություն
