ՀՀ սպորտի եւ երիտասարդության հարցերի փոխնախարար Նազարեթ Մնացականյանն ու աշխատակազմի ղեկավար Մհեր Անանյանը իրենց նոր պաշտոններն ստանձնել են Յուրի Վարդանյանի առաջարկով:
Այսօր Aravot.am-ը նրանցից հետաքրքրվեց. շարունակելո՞ւ են պաշտոնավարել, թե՞ ազատման դիմում են գրելու:
Նազարեթ Մնացականյան, փոխնախարար: « Թույլ տվեք ձեր հարցին պատասխանել մեկ շաբաթից, կամ 10 օրից: Դիմում ներկայացնելու հարցը ընթացքի մեջ է: Անկախ ամեն ինչից, ուզում եմ վստահեցնել, որ որտեղ էլ ծառայեմ կամ աշխատեմ, սպորտը, սպորտի ոլորտը լինելու է իմ ուշադրության կենտրոնում: Հայաստանում դժվար թե գտնվի մի մարդ, որը չսիրի, չհետաքրքրվի սպորտով: Ես էլ սիրել, սիրում ու շարունակելու եմ սիրել սպորտը եւ շարունակելու եմ նպաստել Հայաստանում սպորտի առաջընթացին»:
Մհեր Անանյան, աշխատակազմի ղեկավար: «Ես իմ որոշումը դեռ չեմ կայացրել: Ես մինչեւ այս պաշտոնը ստանձնելը, գիտեք, աշխատում էի համապատասխան տեղում: Երբ Յուրի Վարդանյանն առաջարկեց աշխատակազմի ղեկավարի պաշտոնը, համաձայնեցի: Եվ հավատացեք, որ ուրիշ ոչ մի խոսակցություն մեր մեջ չի եղել: Ես պատրաստ եմ Յուրի Վարդանյանի համար գնալ ցանկացած պատերազմի եւ, անգամ, զոհվել: Մենք թիմային աշխատանքի մեջ ենք: Ես կուսակցական չեմ եւ կուսակցական խաղերի չեմ մասնակցում»:
Կարդացեք նաև
Հարցին, եթե նոր նախարարն առաջարկի մնալ եւ համատեղ աշխատել` կհամաձայնե՞ք, Մհեր Անանյանը պատասխանեց. «Կմտածեմ: Որպես լուրջ մարդ, ես ինձ տեսնում եմ այնտեղ, որտեղ ինձ ավելի լավ եմ զգում: Շատ հարգելով պարոն Յուրի Վարդանյանին եւ նորանշանակ նախարարին, ինձ էլ եմ շատ հարգում: Ես քաղծառայող եմ եւ մենք բոլորս գործում ենք օրենքի շրջանակներում»:
Աշոտ ՀԱԿՈԲՅԱՆ
