Լեգենդար բասկետբոլիստ, ԽՍՀՄ հավաքականի կազմում օլիմպիական խաղերի չեմպիոն, լիտվացի Շարունաս Մարչուլյոնիսը, որ հանդես է եկել Վիլնյուսի «Ստատիբայում» եւ ԽՍՀՄ հավաքականում եւ առաջիններից մեկն էր եվրոպական եւ խորհրդային բասկետբոլիստներից, որ հանդես է եկել NBA-ում, «Մեդիամաքս» ընկերության եւ Հայաստանի բասկետբոլի ֆեդերացիայի նախաձեռնությամբ Երեւանում է:
«Մեդիամաքսը» իր հիմնադրման 15-ամյակի կապակցությամբ նախատեսել է պարբերաբար հրավիրել համաշխարհային սպորտի լեգենդների, որոնք իրենց փորձը կփոխանցեն Հայաստանի պատանի ու երիտասարդ մարզիկներին: «Մեդիամաքսի» տնօրեն Արա Թադեւոսյանն Aravot.am-ին ասաց, որ նախապատվությունը տրվելու է Հայաստանում գործող մարզաձեւերի համաշխարհային աստղերին հրավիրելուն եւ որ այդ ծրագրում առաջինը բասկետբոլն է դարձել:
Այսօր Շարունաս Մարչուլյոնիսը «Գրանդ սպորտ» մարզական ակումբում վարպետության դասեր տվեց հայաստանցի 1999/2000 թվականներին ծնված 120-ից ավելի պատանի բասկետբոլիստների: Դրանք շատ ուսուցողական ու տեղին էին, քանի որ մարզաձեւի մեր ֆեդերացիան աշխատում է սեպտեմբերին մանկապատանեկան Եվրալիգային մասնակցելու ուղղությամբ: ՀԲՖ զարգացման ծրագրերի տնօրեն-համակարգող եւ 16 տարեկանների հավաքականի ավագ մարզիչ Արեգ Վաթյանի փոխանցմամբ, մոտ ժամանակներս մեր պատանի բասկետբոլիստները հանդես կգան Բաթումում ավանդաբար կազմակերպվող միջազգային մրցաշարում` Թուրքիայի, Վրաստանի, Ադրբեջանի մասնակցությամբ: Նրա խոսքերով, Մարչուլյոնիսի` այսօրվա ցուցադրած հիմնարար տարրերը կարող են մեծապես նպաստել երեխաների վարպետության բարձրացմանը:
Շարունաս Մարչուլյոնիսը իր հերթին ասաց, որ այս պահին կդժվարանա գնահատական տալ հայկական բասկետբոլի ընդհանուր դրվածքին: Բայց հիշեց Աբովյանի «Հատիս» կանանց թիմը: «Հիմա դժվար է ասել, թե ձեր մոտ տղանե՞րն են ավելի լավ, թե՞ աղջիկները: Նետումների առումով` աղջիկները: Պետք է նրանց տեսնել խաղի մեջ, իսկ սա ընդամենը պարապմունք էր: Բայց մի երկու զույգ ինձ դուր եկավ: Պիտի հետներն աշխատել: Ես երեխաներին բասկետբոլի մի քանի հիմնարար տարրեր ցույց տվեցի, որոնք, կարծում եմ, շատ կարեւոր են ու արդյունավետ» – առաջին տպավորություններով կիսվեց աստղը:
Աշոտ ՀԱԿՈԲՅԱՆ
