Գավառից և հարակից գյուղերից շուրջ 50 դպրոցականներ հունիսի 5-ին այցելել էին ՀՀ ՊՆ Վ. Սարգսյանի անվան ռազմական ինստիտուտ։ Գավառի տարածաշրջանի երեխաները շրջեցին ռազմական ինստիտուտում, ծանոթացան ուսանողների ուսման ու կեցության պայմաններին, հանդիպեցին իրենց մարզից բուհում սովորող երիտասարդների հետ։
Այցելությունը կազմակերպել էր «Գեղարեգ» կրթամշակութային հասարակական կազմակերպությունը Հայաստանի երիտասարդական հիմնադրամի՝ որպես ՀՀ նախագահի գործընկեր կազմակերպության հայտարարած դրամաշնորհային մրցույթի շրջանակներում։
Գեղարքունիքի մարզի աշակերտները եղան նաև ինստիտուտի կրակային պատրաստության ամբիոնում։ Ամբիոնի պետ, փոխգնդապետ Կ. Գլուստյանը տեղեկացրեց, որ ամբիոնը կուրսանտներին սովորեցնում է տարբեր տեսակի զենքերի հետ վարվելու, օգտագործելու կանոնները։ Փոխգնդապետը պատասխանեց նաև երեխաների հարցերին։ Դրանք վերաբերում էին ռազմական ինստիտուտում աղջիկների սովորելու հնարավորություններին, ինստիտուտ ընդունվելու կարգին, զորավարժություններին, ուսումից հետո ինստիտուտի շրջանավարտների հետագա ծառայությանը, դասավանդվող առարկաներին։
Նշվեց, որ ռազմական ինստիտուտում դասավանդվում է մոտ 20 առարկա։ Ռազմական ինստիտուտի օտար լեզուների ժամանակակից լսարաններում գործող խմբակների լավագույն մասնակիցները հնարավորություն են ունենում կրթությունը շարունակել Հունաստանի, Գերմանիայի, Ֆրանսիայի ռազմաուսումնական հաստատություններում: Ընդունելության քննություններն անցկացվում են ՀՀ կրթության և գիտության նախարարության սահմանած` բարձրագույն ուսումնական հաստատություններում ընդունելության միասնական քննակարգով` «Մաթեմատիկա» և «Ֆիզիկա» առարկաներից: Դիմորդները «Ֆիզիկական պատրաստություն» առարկայից քննությունը հանձնում են ռազմական ինստիտուտում։
Կարդացեք նաև
«Գեղարեգ» կրթամշակութային հասարակական կազմակերպության նախագահ Գրիգոր Դաշտոյանը նշեց, որ նման այցելությունների նպատակն է երեխաներին ծանոթացնել զինվորականի կյանքին, ծառայությանը, զինվորական մասնագիտություններին, որպեսզի ճիշտ պատկերացում կազմեն հայոց բանակի վերաբերյալ, ինչպես նաև հետագայում բանակը համալրեն և՜ որպես լավ զինվորներ, և՜, ինչու ոչ, որպես ապագա կուրսանտներ ու հրամանատարներ։
Ռազմական ինստիտուտից հետո աշակերտներն այցելեցին Արթուր Ղարիբյանի, Դուշման Վարդանի տուն-թանգարաններ, եղան «Եռաբլուր» պանթեոնում։
Հայաստանի երիտասարդական հիմնադրամի
հասարակայնության հետ կապերի ծառայություն
