Ազգային ժողով-կառավարություն հարցուպատասխանի ժամանակ ՀՀԿ պատգամավոր Նաիրա Կարապետյանը դարակազմիկ հարց բարձրացրեց: Մարդիկ փոխում են իրենց բջջային օպերատորին, բայց համարը մնում է նույնը, իսկ զանգահարողը չի իմանում եւ նրա հաշվեկշռում եղած գումարն ամբողջությամբ ծախսվում է: Նա կառավարությունից պահանջում էր, որ զանգահարելիս տեղեկություն հաղորդվի «դուք զանգահարում եք այս օպերատորի տիրույթ» կամ որեւէ նման բան:
Ի տարբերություն մինչ այդ պատգամավոր Էդմոն Մարուքյանի կողմից հնչեցրած Վանաձորի քիմպրոմի աշխատակիցների աշխատավարձերի մասին հարցի, որին էներգետիկայի նախարար Երվանդ Զախարյանը պատասխանեց, թե դա մասնավոր ընկերություն է, եւ կառավարությունը չի կարող մտնել այդ ընկերության տիրույթ, Նաիրա Կարապետյանի հարցին կառավարության աշխատակազմի ղեկավար-նախարար Դավիթ Հարությունյանը նույն ոգով չպատասխանեց, եւ խոստացավ, որ այդ հարցով կառավարությունը կդիմի Հանրային ծառայությունները կարգավորող հանձնաժողովին:
Մելանյա ԲԱՐՍԵՂՅԱՆ
