Խորհրդարանում «ՀՀ հանրային ծառայությունները կարգավորող հանձնաժողովի կողմից էներգետիկայի սակագնի փոփոխման որոշման եւ հիմնավորման վերաբերյալ» թեմայով խորհրդարանական լսումներ են ընթանում: Դրանց ներկա են բավական շատ թվով պատգամավորներ եւ բոլորն էլ ցանկանում են իրենց հարցերի պատասխանները ամբողջական ստանալ Հանրային ծառայությունները կարգավորող հանձնաժողովի նախագահ Ռոբերտ Նազարյանից:
Լսումները վարող ԱԺ տնտեսական հարցերի մշտական հանձնաժողովի նախագահ Վարդան Այվազյանին ի սկզբանե դուր չեկավ, որ պատգամավորները շատ հարցեր ունեն: Նա հորդորեց իր գործընկերներին միանգամից հերթագրվել, այլապես հետո հնարավորություն չեն ունենա հարց տալու: Ասել է, թե Ռոբերտ Նազարյանի պատասխաններից բխող հավելյալ հարցերն այդպես էլ անպատասխան կմնան: Առաջարկ եղավ անգամ արձագանքելու հնարավորությունը հանել, որպեսզի ժամանակ շահեն:
Ի հեճուկս Վարդան Այվազյանի այս մղումների, «Ժառանգություն» խմբակցության ղեկավար Ռուբեն Հակոբյանն իր կողքին նստած ԲՀԿ-ական պատգամավոր Ստեփան Մարգարյանին, որը հնչեցնում էր իր հարցերը, հորդորեց. «Ձգի, երկար ձգի»:
Հիշեցնենք, որ մի քանի շաբաթ առաջ, նույն դահլիճում, 2013 թվականի բյուջեի կատարողական քննարկումների ժամանակ Վարդան Այվազյանը կրկին նույն ոճով էր աշխատում`թույլ չտալով, որ պատգամավորները հարցեր տան պատկան գերատեսչությունների ներկայացուցիչներին:
Նելլի ԳՐԻԳՈՐՅԱՆ
