Հունիսի 18-19-ը Հայաստանում առաջին անգամ կանցկացվի «Կովկասի առաջնություն» խորագրով երգի և պարի մրցույթ-փառատոն:
Միջազգային փառատոնների կովկասյան ասոցիացիայի նախագահ, մրցույթ-փառատոնի կազմակերպիչ Արման Ղուկասյանն այսօր լրագրողների հետ հանդիպման ժամանակ ասաց, որ Հայաստանում առաջին անգամ է անցկացվում այսպիսի մեծամասշտաբ մրցույթ-փառատոն, որին մասնակցում են տարբեր ազգերի ու ազգային փոքրամասնությունների ներկայացուցիչներ:
«Թեև մրցույթ-փառատոնը «Կովկասի առաջնություն» խորագիրն ունի, բայց դա չի նշանակում, որ միայն կովկասյան երկրներն են մասնակցում»,- ասաց Ա. Ղուկասյանը և տեղեկացրեց, որ փառատոնին մասնակցելու ցանկություն են հայտնել երեսուն ազգի ներկայացուցիչներ, որոնցից, սակայն միայն տասնութը կմասնակցեն:
Բանախոսի խոսքով՝ փառատոնը, ընդհանուր առմամբ, կունենա 400-500 մասնակից:
Կարդացեք նաև
Այն կմեկնարկի վաղը` Գ. Սունդուկյանի անվ. ազգային ակադեմիական թատրոնի հարակից այգում: Կսկսվի շքերթով, որին կհաջորդի մրցույթը:
Ա. Ղուկասյանը տեղեկացրեց նաև, որ մրցույթն անցկացնում են առանց տարիքային սահմանափակման. «Պարզապես, առանձնացրել ենք վեց տարիքային խմբեր, որոնք բոլորն էլ պատվոգրեր կստանան: Հաղթողներին կառանձնացնենք, սակայն դրամական պարգևներ չեն լինի, որովհետև առայժմ չունենք այդ հնարավորությունները»,- ասաց մրցույթ-փառատոնի կազմակերպիչը:
Սիրանուշ ՀԱՅՐԱՊԵՏՅԱՆ
