Այսօր Գյումրու քաղաքապետ Սամվել Բալասանյանի որոշմամբ՜ Գյումրու փոխքաղաքապետ է նշանակվել Շիրակի մարզի դատախազի նախկին տեղակալ Վաղարշակ Մխիթարյանը:
Հիշեցնենք, որ Գևորգ Կոստանյանի` գլխավոր դատախազ նշանակվելուն պես, սկսեցին ազատվել նախկին կադրերից, որոնցից մեկն էլ Վաղարշակ Մխիթարյանն էր:
Տևական ժամանակ է` Գյումրիում խոսակցություններ էին պտտվում այն մասին, որ Սամվել Բալասանյանը իր սանիկի` փոխքաղաքապետ Գուրգեն Մալխասյանի փոխարեն ուզում է աշխատանքի ընդունել գործազուրկ դատախազին: Այս թեմային Aravot.am-ն անդրադարձել էր դեռևս երկու ամիս առաջ ու փաստորեն մեր տեղեկություններն այս երկու օրվա ընթացքում հատ-հատ հաստատվեցին. փոխքաղաքապետ Գուրգեն Մալխասյանը պաշտոնապես հրաժարական տվեց, իսկ այսօր նրա փոխարեն աշխատանքի ընդունվեց 54-ամյա Վաղարշակ Մխիթարյանը: Նշենք, որ նրա որդին Գյումրու ավագանու անդամ է:
Նախկին դատախազը բավական հարուստ կենսագրություն ունի. իր աշխատանքային կենսագրությունը սկսել է 1976 թվականից, ինչպես նախորդ փոխքաղաքապետ Գուրգեն Մալխասյանը, այնպես էլ նա մասնագիտությամբ իրավաբան է:
Կարդացեք նաև
Ի դեպ, իրավական ոլորտի մասնագետների բնութագրմամբ, Գյումրու քաղաքապետարանում բարձրորակ իրավաբան չկա, որը գրագետ, իրավական առումով հիմնավորված կշարադրի այս կառույցի բողոքները, հայցերը` ուղղված դատարանին ոստիկանությանը, դատախազությանը, և մասնագիտությամբ իրավաբանի աշխատանքի ընդունելը դարձել էր օրհասական հարց: Մինչ Գուրգեն Մալխասյանի արձակուրդ գնալն ու պաշտոնից հեռանալը այս հարցերով զբաղվում էր հենց նա:
Նունե ԱՐԵՎՇԱՏՅԱՆ
