Կոտայքի մարզի ընդհանուր իրավասության դատարանում ընթացող Վարդան Պետրոսյանի ավտովթարի գործով այսօրվա նիստում հայտարարություն արեց նրա պաշտպանը՝ Նիկոլայ Բաղդասարյանը։ Ներկայացվեցին ապացույցներ՝ 21 էջից բաղկացած հայտարարությունը եւ տեսանյութը ¥հայտարարության մանրամասները կներկայացնենք հաջորդիվ):
Ապա սկսվեց տուժողների հարցաքննությունը։ Տուժող Արթուր Հակոբյանը ասաց, որ դեպքի օրը ավտոմեքենան վարել է ինքը, եղբայրը նստած է եղել իր կողքը, իսկ 4 երեխաները նստած էին հետեւում ու պետք է գնային Աշտարակ։ Այդ ժամանակ նա կանգնեցրել է մեքենան հողածածկ գոտում, մի քանի վայրկյանով՝ ըստ նրա. «Կողային հայելիներով նայեցի, լույս էր գալիս զգացի, որ արագ է գալիս, ասացի՝ թող գա անցնի՝ նոր, արագությունը 150 կլիներ երեւի, 25 տարվա աշխատանքային ստաժ ունեմ, որեւէ խախտում չեմ արել։ Իսկ այդ, ինչ տեսա, ամենաքիչը հարբած մարդու գործ էր, լուրջ մարդը չէր կարող գալ-խփել հետեւից, մխրճվել»,- ասաց նա։
Տուժողը նաեւ ասաց, որ դրանից հետո ինքը հիվանդանոցում է ուշքի եկել ցնցումներից. «Տեսա կողքս մեկը նասիլկայի մեջ պառկած է, վրան էլ շոր գցած, հարցրի ո՞վ է, մեկը պատասխանեց՝ քո մեքենային հարվածողն է՝ Վարդան Պետրոսյանն է»,- շարունակեց նա։
Ասաց նաեւ, որ նրան չէին կարողանում նստեցնել, ձեներ էր հանում, ահավոր էր, երեւի խմածության մեջ էր։
Ռուզան ՄԻՆԱՍՅԱՆ
