«Կարծում եմ Հայաստանում պետք է շատ լուրջ ուսումնասիրվի Ահմեթ Դավութօղլուի շաբաթ առաջ գրված հոդվածը»,- այսօր` հուլիսի 7-ին, «Հայացք» մամլո ակումբում լրագրողների հետ հանդիպման ընթացքում հայտարարեց Միջազգային անվտանգության ինստիտուտի հիմնադիր նախագահ, քաղաքական վերլուծաբան Ստեփան Սաֆարյանը:
Նա համարում է, որ Թուրքիայի արտգործնախարարի հոդվածում չափազանց նուրբ շերտեր կան, որպեսզի հնարավոր լինի հասկանալ, թե Հայոց ցեղասպանության 100-րդ տարելիցին ընդառաջ, ինչպիսին է լինելու Թուրքիայի քաղաքականությունը.
«Թուրքիան փորձելու է ոչ միայն Հայաստանի հետ հարաբերությունների նորմալացման նոր պատրանք ստեղծել, այլ նաեւ այդպիսի պատրանք փորձելու է ստեղծել հայկական սփյուռքի հետ»:
Ստեփան Սաֆարյանը համեմատություն անցկացրեց Ահմեթ Դավութօղլուի նախկին հոդվածների եւ այս հոդվածի միջեւ` հայտարարելով, որ նախկինում, եթե նա գրում էր` Թուրքիայի օսմանյան անցյալն իր համար ռազմավարական ակտիվ է, ապա հիմա նա խուսափում է դա ասել, եւ հերքում է բոլոր այն մեղադրանքները, թե Թուրքիան ցանկանում է վերականգնել Օսմանյան կայսրությունը: Պարոն Սաֆարյանը համարում է, որ հայկական կողմը պետք է չափազանց զգույշ լինի, քանի որ այդ հոդվածի հիմնական նպատակը Հայոց ցեղասպանության 100-րդ տարելիցը շրջանցելն է:
«Ես չեմ տեսնում, որ պաշտոնական Երեւանը լուրջ նախապատրաստություն ունի 100-րդ տարելիցի կապակցությամբ, բացի երեկույթային մակարդակի միջոցառումներից եւ հետեւաբար` զարմանում եմ` Թուրքիան ինչի՞ց է անհանգստացել, եթե Երեւանը հստակ ռազմավարություն չունի: Եթե 2015 թվականին որեւէ արմատական փոփոխություն չլինի տարածաշրջանում, որը խոշոր տերություններին ստիպի այս կամ այն դրդապատճառներով ճանաչել Հայոց ցեղասպանությունը, ապա ես չեմ տեսնում, որ Հայաստանը շարժվում է կամ լուրջ աշխատանք է տանում այս կամ այն երկրում դա ճանաչելու ուղղությամբ»,- ասաց վերլուծաբանը:
Ամի ՉԻՉԱԿՅԱՆ