Օրերս կարկուտից մեծ վնասներ կրած Արագածոտնի մարզի Արտենի գյուղ այցելելիս, նկատեցինք, որ մշակույթի տան պատերին դեռ Լենինի նկարն է, ինչպես նաև սովետական տարիների բարեկամությունը խորհրդանշող պատկերը`«Миру Мир» հայտնի արտահայտությամբ: Գյուղացիներից հետաքրքրվեցինք, թե ինչո՞ւ են այս նկարները պահում. չէ՞ որ Խորհրդային միության գրեթե բոլոր նախկին երկրներից ապամոնտաժեցին, տապալելով հանեցին անգամ Լենինի մետաղաձույլ արձանները: Ի պատասխան մեր հարցի, կարկուտից ահռելի վնաս կրած գյուղացիներից մեկն ասաց. «Չէ, մենք չենք հանի Լենինի նկարը, գյուղովի պայքարեցինք, որ չհանվի, էլի միջների մարդը Լենինն էր, հայ ղեկավարներից գոնե մեկը թող Լենինի կեսի չափ դելավոյ ղեկավար լինի, տեսնում ենք էլի, կարկուտը ընչազրկության հասցրեց մեզ, ցավակցելուց բացի ի՞նչ են անում որ: Երևի ցավակցությունն էլ ի սրտե չէ»:
Այնուհետ գյուղացիները մեզ կարկուտից վնաս կրած մրգատու այգիներ ուղեկցելիս ճանապարհին ցույց տվեցին ավերակի վերածված մի տարածք` ասելով, որ դա իրենց թալանված գինու գործարանն է, որը ժամանակին հանրապետությունում եղել է ամենամեծը: Երբ հետաքրքրվեցինք, թե ո՞վ է ավերակ դարձրել, թալանել, գյուղացիները խորհրդավոր տոնով ասացին. «Ի՞նչ իմանանք , վերջին սեփականատերը Ճոյտն էր( խոսքը ԱԺ նախկին պատգամավոր, գործարար Հակոբ Հակոբյանի մասին Է):
Երբ արդեն լքում էինք գյուղը, գյուղացիները ցույց տվեցին մի կառույց` ասելով, որ սա էլ գյուղի բաղնիքն է եղել. երբ հետաքրքրվեցինք, թե հիմա որպես ի՞նչ է ծառայում, այս հարցի պատասխանն էլ բնակիչները չունեին, ասացին, որ չնչին գնով սեփականաշնորհվել է, ինչպես մյուս բոլոր կառույցները:
Նունե ԱՐԵՇՎԱՇՏՅԱՆ
