ԱԺ ՀՀԿ խմբակցության անդամ Լեռնիկ Ալեքսանյանն այսօր «Իրատես de facto» մամուլի ակումբում խոսելով աշնանը արտաքին եւ ներքին քաղաքական զարգացումներից, կարծիք հայտնեց, որ քաղաքական դաշտը աշնանը կրկին կակտիվանա. «Քաղաքական ուժերը պետք է փորձեն միավորվել քաղաքացիական հասարակության հետ եւ ստեղծեն ավելի առողջ ընդդիմություն»:
Պրն Ալեքսանյանը ընդդիմության ակտիվությունը դրական երեւույթ է համարում, քանի որ, նրա կարծիքով, իշխանության համար պետք է ընդդիմություն` զգոն լինելու եւ սխալները ուղղելու համար:
Պրն Ալեքսանյանը մտահոգված է, որ իշխանության եւ ընդդիմության ներկայացուցիչների հարցում օբյեկտիվ գնահատականներ չեն տրվում. «Այսօր ընդդիմությունը քննադատում է, թե ունենք կաշառակեր իշխանավորներ, բայց եթե ընդդիմության համակիրներից մեկը շատ գումար ունի` դառնում է բարերար, իսկ եթե նույն մարդը սատարում է իշխանությանը` համարում են թալանչի»: Պրն Ալեքսանյանի խոսքով այդպես չպետք է լինի:
Ընդդիմությանը գնահատականներ տալուց հետո, Aravot.am-ի խնդրանքով, պրն Ալեքսանյանը մեկնաբանեց նաեւ Ռոբերտ Քոչարյանի տված վերջին հարցազրույցը եւ դրանում նշված կետերը` արդյոք քաղաքականություն վերադառնալու քայլ էր դա եւ արդյոք հնարավոր է՞, որ նա դառնա ընդդիմության ներկայացուցիչ:
Կարդացեք նաև
Լեռնիկ Ալեքսանյանի կարծիքով` քաղաքականություն միանգամից չեն որոշում ու վերադառնում. «Եթե քաղաքական դաշտը ընդունեց Ռոբերտ Քոչարյանին եւ այս ամբողջի մեջ Ռոբերտ Քոչարյանը նկատեց, որ այսօր իր պահանջարկը կա հասարակության մեջ, ինչու՞ չվերադառնա: Իսկ եթե տեսնի, որ պահանջ չկա `չի վերադառնա»:
Պրն Ալեքսանյանը օրինակ բերեց, ասելով՝ որ Լեւոն Տեր-Պետրոսյանի վերադարձի հետ կապված նման փորձ կա. « Լեւոն Տեր-Պետրոսյանը լռեց-լռեց, հետո իրեն թվաց, թե իր պահանջարկը կա, վերադարձավ, բանից պարզվեց` այդքան էլ չկար»:
Նրա կարծիքով` քաղաքական տեխնոլոգիաները այնպիսին չէին եւ 1990-ական թվականները չէին, որ մարդիկ հեղափոխական տրամադրություն ունենային:
Մանրամասն` տեսանյութում
Էլյա ՀՈՎՀԱՆՆԻՍՅԱՆ
