Երևանի քաղաքապետարանը մայրաքաղաքում բնակվող սոցիալապես անապահով խավի կարիքները որոշակիորեն մեղմելու նպատակով մի շարք կազմակերպությունների հետ համագործակցելով իրականացնում է սոցիալական ուղղվածության տարաբնույթ ծրագրեր: Այս անգամ Երևանի քաղաքապետ Տարոն Մարգարյանի հանձնարարությամբ մեկնարկել է Երևանի քաղաքապետարանի և «Կամրջակ» սոցիալ-բարեգործական ՀԿ-ի` ծնողազուրկ երեխաներ ունեցող ընտանիքների պարենային աջակցության ծրագիրը:
Շահառուներն ընտանիքների անապահովության գնահատման համակարգում հաշվառված 40.00 և ավելի միավոր ունեցող, երկու և ավելի ծնողազուրկ երեխաներ ունեցող շուրջ 260 ընտանիքներն են: Ծրագիրը մեկնարկել է Աջափնյակ, Դավթաշեն և Մալաթիա-Սեբաստիա վարչական շրջաններում, այնուհետև կշարունակվի նաև մայրաքաղաքի մյուս բոլոր վարչական շրջաններում: Նախաձեռնության շրջանակում այցելություն է կազմակերպվել Աջափնյակում բնակվող, ծնողազուրկ երեխաներ ունեցող երկու ընտանիքներ, որոնց, պարենային ծանրոցներից զատ, նաև հագուստ է նվիրաբերվել: Ծրագրի շահառուները ինչպես սոցիալական ծառայության տարածքային բաժիններում, այնպես էլ տնային այցելությունների ժամանակ շնորհակալություն են հայտնել Երևանի քաղաքապետարանին` ի դեմս քաղաքապետ Տարոն Մարգարյանի, իրենց խնդիրները ուշադրության կենտրոնում պահելու և պարբերական աջակցություն ցուցաբերելու համար:
Երևանի քաղաքապետարանի տեղեկատվության
և հասարակայնության հետ կապերի վարչություն
