Հայաստանում Մեծ Բրիտանիայի դեսպանատունը և «Լույս» հիմնադրամն այսօր համագործակցության հուշագիր ստորագրեցին՝ ազդարարելով «Չիվնինգի և «Լույսի» կրթաթոշակներ» համատեղ ծրագրի մեկնարկը:
Ինչպես այսօր լրագրողների հետ հանդիպման ժամանակ ասաց «Լույս» հիմնադրամի կրթական ծրագրի գործադիր տնօրեն Ժաքլին Կարաասլանյանը, «Չիվնինգի և «Լույսի» կրթաթոշակներ» ծրագրին կարող են դիմել ՀՀ քաղաքացիները: Մեծ Բրիտանիայի Օքսֆորդի և Քեմբրիջի համալսարաններում սովորել ցանկացող երիտասարդները 2014 թ. օգոստոսից կարող են դիմել Չիվնինգի կրթաթոշակի ծրագրին. «Համալսարանից ընդունելության հրավեր ստանալուց հետո թեկնածուները կարող են դիմել «Լույս» հիմնադրամին, և Հայաստանում բրիտանական դեսպանատունն ու «Լույս» հիմնադրամը կվճարեն ուսման վարձը, կեցության ամենամսյա ծախսերը, նպաստային փաթեթը, ճանապարհածախսը»,- մանրամասնեց Ժ. Կարաասլանյանը և հավելեց, որ ուսման ավարտից հետո շահառուները պարտավորվում են ձեռք բերած հմտությունները ներդնելու Հայաստանի զարգացման գործում. «Համագործակցությունը և ուղեղների շրջանառության ապահովումն այսօր կենսական անհրաժեշտություն են: Ներկայիս գիտելիքահենք տնտեսությունը պահանջում է սովորելու, գործելու և հատկապես համատեղ ստեղծելու հմտություններ»,- ասում է տիկին Կարաասլանյանը:
«Մեր նպատակն է աջակցել հայ երիտասարդներին՝ կրթություն ստանալու աշխարհի լավագույն համալսարաններում, ինչպես նաև խրախուսելու նրանց վերադարձը հայրենիք՝ նպաստելու Հայաստանի զարգացմանը»,- ընդգծելով Հայաստանում բրիտանական դեսպանության և «Լույս» հիմնադրամի միջև համագործակցության կարևորությունը՝ ասաց Հայաստանում Մեծ Բրիտանիայի արտակարգ և լիազոր դեսպան Քեթրին Ջեյն Լիչը:
Նա ուրախությամբ նշեց նաև, որ այս տարի նշվում է Չիվնինգի կրթաթոշակի 30-ամյակը, և այդ երեք տասնամյակների ընթացքում իրենց հաջողվել է աջակցել շուրջ 43. 000 ուսանողների՝ կազմակերպելով նրանց կրթությունը Մեծ Բրիտանիայի լավագույն համալսարաններում:
Կարդացեք նաև
Սիրանուշ ՀԱՅՐԱՊԵՏՅԱՆ
