ԱԺ փոխխոսնակ Էդուարդ Շարմազանովն այսօր ԱԺ հայտարարությունների ժամին խոսեց սահմանադրական բարեփոխումների շուրջ անհամաձայնությունների մասին: Նա ասաց, որ մեր երկրում վաղուց արդեն հասունացել է համակարգային բարեփոխումներ անելու անհրաժեշտությունը. «Առանց սահմանադրական բարեփոխումների՝ դա ուղակի անհնար է: Վերջին տարիներին մեր երկրի բոլոր քաղաքական ուժերն արտահայտվում էին սահմանադրական բարեփոխումների անցկացման օգտին: Ավելին, խորհրդարանական ընտրությունից առաջ ոչ իշխանական ուժերից շատերը խոսում էին սահմանադրական բարեփոխումներ բերելու հետ կապված, այսօր արդեն նրանք ասում են՝ ժամանակը չէ: Բարեկամներս, բա ե՞րբ է ժամանակը: Ավելին, պետք է նշեմ, որ այդ քաղաքական ուժերից մի քանիսը հրաժարվում են այսօր նույնիսկ մասնակցել քննարկումներին»:
Շարմազանովը զգուշացրեց. «Պատմությունը ցույց է տվել, որ բոյկոտի գնացող ուժերը, քննարկումներից խուսափող ուժերնն իրենք են մեծապես տուժում: Նման դիրքորոշումը որդեգրելու ընթացքում շատ հնարավոր է, որ այդ ուժերից մի քանիսը հայտնվեն քաղաքական լուսանցքում»:
Էդուարդ Շարմազանովին պատասխանեց ԲՀԿ պատգամավոր Վահան Բաբայանը. «Եղան հայտարարություններ, որ մարդիկ չեն կարդացել, բայց դեմ են արտահայտվում: Մենք՝ չկարդացածներս, առանց կարդալու էլ դեմ չենք որոշակի փոփոխությունների: Բայց սահմանադրական փոփոխություններն ունեն ժամանակներ, որոշակի պահեր»:
Վահան Բաբայանը վստահեցրեց, որ այսօր հասարակությանը չի հետաքրքրում այդ հարցը, թե Սահմանադրության, որ հոդվածն ինչպես են փոխելու. «Հուզում է աշխատատեղերի հարցը: Յուրաքանչյուր քաղաքացու ավելի շատ այսօր հետաքրքրում է կարմիր գծերի հարցը, արագաչափերի հարցը, քան Սահմանադրության փոփոխությունը: Ես ուզում եմ սթափվեք: Հասարակությունն ինքն իր կարծիքն անպայման կասի եւ փողոցում, եւ դրսում, եւ խորհրդարանում»:
Կարդացեք նաև
Հիշեցնենք, որ սա առաջին անգամ չէ, որ Վահան Բաբայանը խոսում է հասարակությանը փողոց դուրս բերելու մասին: Նրա վերջին նման հայտարարությունը՝ փողոցում բարիկադներ կառուցելու բուռն քննարկումների տեղիք էր տվել:
Հռիփսիմե ՋԵԲԵՋՅԱՆ
