«Պարոն Թովմասյան, առողջություն ձեր պապիկին: Իմ պապիկը եւս 90 տարեկանին մոտ է: Ինքը եւս սահմանադրական փոփոխությունների մասին հարցեր չի տալիս ինձ, բայց իմ պապը հարցնում է, թե երբ են այս երկրում իշխանությունները փոխվելու, երբ է այս երկրում մի բան փոխվելու: Ազնվորեն եմ ասում՝ չի եղել մի քաղաքացի, որ ինձ սահմանադրական փոփոխությունների մասին հարց տա»,- այսօր «Ժառանգության» կազմակերպած «Սահմանադրական բարեփոխումներ. թեր եւ դեմ» խորհրդաժողովի ժամանակ Հրայր Թովմասյանին ասաց «Ժառանգություն» կուսակցության փոխնախագահ Արմեն Մարտիրոսյանը:
Այնուհետեւ դիմելով ՀՅԴ պատգամավոր Արծվիկ Մինասյանին՝ ասաց, որ 90-ականներից կողմ եք սահմանադրական փոփոխությանը, բայց ես դեմ եմ, որովհետեւ այս իշխանությունների նկատմամբ այդ վստահությունը չունեմ. «Ողորմած տատս մի լավ խոսք ուներ: Ասում էր՝ սատանան այն ժամանակ է ուրախանում, երբ փորձած բանը մեկ էլ են փորձում: Այս իշխանությունները, ներողություն, քցելու բազմավաստակ վարպետ են»:
Արմեն Մարտիրոսյանը վստահեցրեց, որ ճաշը կուտեն եւ մի հատ ճանճ, մի կեղտ կընկնի, ստիպված կթափեն այդ ճաշը. «Իշխանությունը մեր առաջարկներին դեմ է, դա նշանակում է, որ հետին միտք կա: Իշխանությունը չունի այդ հուսալի մեկը: Սերժ Սարգսյանը հասկանում է, որ այն անձը, որը նախագահ է լինելու, տիրապետելու է ուժային կառույցներին, մյուս օրը կարող է պայմանավորվածությունները չպահել, ինչպես մինչեւ հիմա է եղել: Ուժեղ մարդ բերի՝ կարող է պայմանավորվածությունները չպահի, թույլին էլ չեն բերի: Դրա համար այս փոփոխություններն են առաջարկում: Մինչեւ մենք իրավիճակի փոփոխություն չունենանք, համոզված եմ, մենք սահմանադրական փոփոխություն անելու իրավունք չունենք: Լավագույն գաղափարը ամենափոքր մի դետալը մի ստորակետով փոփոխվելու է, ունենալու ենք ավելի վատթար վիճակ, ունենալու ենք ԽՄԿԿ»:
Հռիփսիմե ՋԵԲԵՋՅԱՆ
Պապին, տատին և ոչ թե պապուն,տատուն….???