2016թ. ԱՊՀ նախագահությունը կստանձնի Ղրղզստանը, իսկ 2015թ. համանախագահող երկիր կլինի, այս մասին Մինսկում ԱՊՀ երկրների գագաթնաժողովի ժամանակ հայտնել է Ղրղզստանի նախագահ Ալմազբեկ Ատամբաևը՝ ավելացնելով, որ 2015թ. ապրիլին Բիշկեքում կանցկացվի համագործակցության պետությունների արտաքին գործերի նախարարների հանդիպում:
2015թ. նախագահությունը կստանձնի Ղազախստանը, իսկ հաջորդ գագաթնաժողովը տեղի կունենա մյուս տարի սեպտեմբեր-հոկտեմբեր ամիսներին: Փոխանցում է «Բելտա»-ն:
Բելառուսի նախագահ Ալեքսանդր Լուկաշենկոն իր խոսքում ԱՊՀ երկրներին կոչ է արել շեշտը դնել Ուկրաինայի հակամարտության վրա՝ մեղադրելով Կիևին, որ իրենց առաջնային հարցերը լուծում են Եվրոմիությունում, իսկ հետո ԱՊՀ-ից օգնություն խնդրում.
«Անթույլատրելի է, երևի, երբ մի երկրի, ինչպիսին է Ուկրաինան, առաջնային հարցերը լուծվում են հեռավոր ինչ-որ տեղ՝ կամ Բեռլինում կամ Միլանում: Հարց է առաջանում՝ ինչո՞ւ եք մեզ դիմում այլ հարցերով, օրինակ՝ տնտեսական, քաղաքական, դիվանագիտական: Գուցե պետք է այդ հարցերը լուծել այնտեղ՝ Բեռլինում կամ Միլանում», – ասել է Լուկաշենկոն:
Կարդացեք նաև
Ռուսաստանի նախագահ Վլադիմիր Պուտինը նշել է, որ իրենք ցանկանում են մերձենալ Եվրոմիության հետ ու երբեք նրա հակառակորդը չեն եղել.
«Հարցը պայմանների մեջ է: Խնդիրները չեն առաջանում պատասխան կամ պաշտպանական միջոցներ ձեռնարկելուց, այլ նրանից, որ մեր գործընկերները հարկ չեն համարում ժամանակակից, բաց, ամբողջական ձևաչափով, անաչառ և պրոֆեսիոնալ ձևերով քննարկել այն բոլոր ռիսկերը, որոնք ստեղծվում են Ռուսաստանի և ԱՊՀ այլ երկրների համար, երբ գործընկերները միանում են ուրիշ տնտեսական միավորումների», – ասել է Պուտինը:
ՌԴ նախագահը ԱՊՀ երկրների ղեկավարներին մայիսին հրավիրել է Ռուսաստան՝ տոնելու Համաշխարհային 2-րդ պատերազմի հաղթանակի 70 ամյակը:
Երկրների առաջնորդները պայմանավորվել են 2016թ. հայտարարել ԱՊՀ-ում կրթության տարի:
Պատրաստեց Հովհաննես ԻՇԽԱՆՅԱՆԸ
