Այսօր գիշերը ժամը 03.30 սահմաններում դիմակավորված երկու անձիք՝ դանակով ու բենզինով լի շշով, մտնելով 1986 թվականին ծնված Հայարփի Մինասյանի՝ Գյումրու ավտոկայանի մոտակայքում գտնվող տնակը, նրան այրելու սպառնալիքով պահանջել են գումար և ոսկի: Վերջիններս տնից հափշտակել են գումար, տեխնիկա: Վերջինս բնակվել է իր անչափահաս որդու հետ:
Ինչպես Aravot.am-ին փոխանցեց Շիրակի մարզի դատախազ Րաֆֆի Ասլանյանը, ամսի 22-ին ևս մեկ ավազակային հարձակում է տեղի ունեցել Գյումրիում, այս անգամ Սևերսկի թաղամասում: Դարձյալ գիշերվա ժամը 03.30 սահմաններում հարձակվել են Սևերսկի թաղամասի 137/072 հասցեում բնակվող, 1947 թվականին ծնված Վարդուշ Թավրիզյանի վրա՝ նրանից դրամ և ոսկի պահանջելով: Ըստ Թավրիզյանի տված ցուցմունքի, իրենից ևս պահանջել են գումար և ոսկի, սակայն հափշտակել են 3 բջջային հեռախոս,, 10 հազար դրամ և մեկ նոթբուք:
Շիրակի մարզի դատախազի տեղեկացմամբ, ձեռագիրը գրեթե նույնն է, հանցագործությունները տեղի են ունենում գիշերվա նույն ժամին և հիմնականում թիրախ ընտրում են միայնակ ապրող մարդկանց: Րաֆֆի Ասլանյանի հաղորդած տվյալներով, այս տարվա մեջ 7-րդ ավազակային հարձակումն է տեղի ունեցել, երկուսը Շիրակի մարզի Ոսկեհասկ և Ախուրիկ գյուղերում (սրանք դեռ բացահայտված չեն), մնացածը` Գյումրիում: Դատախազի տեղեկացմամբ, ամսի 22-ին և 24-ին տեղի ունեցած դեպքերի առիթով հարուցվել են քրեական գործեր՝ ՀՀ քրեական օրենսգրքի 175 հոդվածի (այն կոչվում է ավազակություն), հատկանիշներով: Կատարվում է նախաքննություն:
Նունե ԱՐԵՎՇԱՏՅԱՆ
