Գյումրու կենտրոնական Վարդանանց հրապարակում տեղադրված գլխավոր տոնածառի լույսերը դեռ չեն վառվել, փոխարենն այսօր վառվեցին մեկ այլ կենտրոնական հատվածի՝ «Նանե» հյուրանոցի դիմացի տոնածառի լույսերը: Հիշեցնենք, որ այս հյուրանոցը հիմնել են լիբանանահայ եղբայրներ՝ Հարութ, Շահե և Նառ Խաչատուրյանները, իսկ այստեղ գործող «Գոհար» երգչախումբը կրում է նրանց մոր անունը:
Այս տոնածառի զարդարանքը թեև տարիներ շարունակ չի փոխվում, սակայն այն միշտ համարվում է ամենանրբաճաշակը: Այս տեղանքն էլ Ձմեռ պապիների համար ամենաեկամտաբերն է:
Քաղաքային իշխանությունները թեև քաղաքի մյուս կենտրոնական հատվածներն էլ քիչ, թե շատ զարդարել են, փորձել են քաղաքին տոնական տեսք հաղորդել, սակայն Գյումրու փողոցների աննկարագրելի ցեխերի ֆոնին այս ամենը իմաստազրկվել է ու բավական խղճուկ պատկեր է ստացվել:
Նունե ԱՐԵՎՇԱՏՅԱՆ