«Փետրվարի 1-ից նշանակվելու եմ «Արմնյուզի» տնօրեն»,-Aravot.am-ի հետ զրույցում ասաց ռեժիսոր, քլիփմեյքեր Հրաչ Քեշիշյանը:
Հիշեցնենք, որ անցյալ տարեվերջից լուրեր շրջանառվեցին այն մասին, որ Հանրապետական կուսակցությունը իր հեռուստաալիքն է բացելու` «Արմնյուզի» փոխարեն: «Արմնյուզի» թիմի մի մասը տեղափոխվելու է «Արմենիա», մյուսը` ATV:
Aravot.am-ը պարոն Քեշիշյանից հետաքրքրվեց` շրջանառվող լուրերը, որ «Արմնյուզի» հենքի վրա է ՀՀԿ-ի հեռուստաալիք ստեղծվելու, համապատասխանո՞ւմ են իրականությանը, նա պատասխանեց. «Ոչ, «Արմնյուզը» չի տրվելու ՀՀԿ-ին»:
Մեր այն հարցին` «Արմնյուզը» շարունակելո՞ւ է մնալ լրատվական ալիք, ի՞նչ ծրագրային և կադրային փոփոխություններ է նախատեսում անել, Հրաչ Քեշիշյանը, չցանկանալով մանրամասնել, պատասխանեց. «Արմնյուզը» շարունակելու է մնալ լրատվական ալիք»:
Կարդացեք նաև
Լուսանկարը՝ Գագիկ Շամշյանի
Aravot.am-ը կապ հաստատեց «Արմնյուզ» հեռուստաընկերության նախկին տնօրեն Արտակ Ալեքսանյանի հետ: Նա նշեց, թե մեր հարցերին այլ անձ է իրավասու պատասխանել: Այդ անձը «Պանարմենիան մեդիա գրուպի» մարքեթինգի և PR պատասխանատու Քնարիկ Առաքելյանն էր: Նա չցանկացավ մանրամասներ տրամադրել ու ասաց. «Պանարմենիան մեդիա գրուպը» հաջորդ շաբաթ հանդես կգա հայտարարությամբ, քանի որ այս հարցը հասարակական մեծ հնչեղություն է ստացել»:
Հիշեցնենք նաև, որ Արտակ Ալեքսանյանն իր թիմով արդեն տեղափոխվել է «Արմենիա» հեռուստաընկերության «Ժամը» լրատվական:
Տաթև ՀԱՐՈՒԹՅՈՒՆՅԱՆ
