«Սպառողների խորհրդատվություն կենտրոն» հ/կ նախագահ Կարեն Չիլինգարյանն այսօր «Երկու երես» մամուլի ակումբում անդրադառնալով շուկայում գրանցված թանկացումներին, նշեց, որ դեկտեմբերին տեղի ունեցած դրամի արժեզրկմամբ պայմանավորված գնաճը կարգավորվել է, բայց ոչ վերջնականապես. «Դեկտեմբեր ամսին գրանցված բարձր գները նվազել են, սակայն այնքան չեն նվազել, որ հասնեն իրենց նախկին մակարդակին։ Ավելի բարձր են, օրինակ, կաթնամթերքը թանկացել է։ Ամեն ինչ՝ կաթնաշոռը, թթվասերը, պանիրը, բացառությամբ կաթի թանկացել են»։ Սակայն, պրն Չիլինգարյանը նկատեց, որ այն բանի հետ մեկտեղ ,որ թանկացրել են կաթնամթերքը, նաեւ քաշն են նվազեցրել։
Բանախոսը նշեց, որ տասը տոկոսով թանկացել են նաեւ մրգերը, բանջարեղենը, քաղցրավենիքները։ Միակ բանը, որ չի թանկացել՝ ոգելից խմիչքն է։ Պրն Չիլինգարյանը այս թանկացումների մեջ չի մեղադրում տնտեսվարողներին, քանի որ դրամի արժեզրկումը եւ ստեղծված տնտեսական դրությունն են հանգեցրել դրան։
«Այս թանկացումների հետ մեկտեղ աշխատավարձները չեն բարձրացրել, իսկ ռուբլու արժեզրկման հետ մեկտեղ նաեւ տրանսֆերտների նվազում է նկատվել»,- նշում է պրն Չիլինգարյանը։
Անդրադառնալով 12 ոչ աշխատանքային օրերին խանութներում առաջին անհրաժեշտության ապրանքների դեֆիցիտին, ասաց. «Մի երկրում, որ 12 օր բանկերը չաշխատեն, դա արդեն խայտառակ վիճակ է, ոչ մի քաղաքակիրթ երկրում նման բան չի եղել»։
Կարդացեք նաև
Էլյա ՀՈՎՀԱՆՆԻՍՅԱՆ
