«Այն, որ փորձել են գործը թաքցնել, ապա սա նշանակում է, ըստ էության, ռուսական զորամասը հանցակից է դարձել»,-այսօր «Հենարան» մամուլի ակումբում լրագրողների հետ հանդիպմանը հայտարարեց «Ընդդեմ իրավական կամայականության» հ/կ-ի նախագահ Լարիսա Ալավերդյանը:
Տիկին Ալավերդյանը կատարվածի վերաբերյալ իր վարկածն ունի: Մասնավորապես նա կասկածում է, որ Պերմյակովը, այսպես ասած, քավության նոխազ է, գուցե ինքը մենակ չի եղել, այստեղ խառնված են նաև արտաքին ուժեր:
Հարցին՝ արդյոք ռուսական կողմը կգնա՞ զիջումների, քանի որ ՀՀ գլխավոր դատախազը խոստացել է դիմել ռուսական կողմին, որ գործը հանձնեն Հայաստանին, տիկին Ալավերդյանը պատասխանեց. «Հարցադրումն արդեն սխալ է: Այդ ՌԴ գլխավոր դատախազը պետք է դիմեր մեր գլխավոր դատախազին՝ ասելով, որ մենք ձեզ ենք տրամադրում այս գործը»:
Դառնալով ՀՀ գլխավոր դատախազի հայտարարություններին՝ տիկին Ալավերդյանը պատասխանեց. «Այն, ինչ ասել է ՀՀ գլխավոր դատախազը, ճշմարտության կեսն է: Նա ամենը չի ասել, դա էլ կարող է ավելի բորբոքել մեր հասարակությանը, քան եթե ոչինչ չասեր»:
Կարդացեք նաև
Տիկին Ալավերդյանը ևս մեկ անգամ շեշտեց, որ «մեղքը ընկնում է այստեղ ներկա գտնվող զորամասի վրա»:
Արդյոք այս հանցագործությունը արտաքին թշնամու կողմին հրահրվա՞ծ է, մասնավորապես դիվերսանտներ, Գյումրիի հանցագործությունը, երեկվա Էրդողանի հայտարարությունը, տիկին Ալավերդյանն արձագանքեց. «Անտեղի եմ համարում որևէ հակառուսական հիստերիա: Մենք չպետք է տրվենք այդ հուզումներին և բերենք այդ դաշտ: Չգիտեմ՝ այսօր ով ինչ է արել, բայց որ դա համապատասխանում է այն նպատակներին, որոնք դրված են Ադրբեջանի, Թուրքիայի կողմից, ոչ թե մեր դեմ, այլ անգամ Ռուսաստանի դեմ, հստակ է: Մենք հստակ կարող ենք ասել, որ միայն դա չէ այդ հանցագործությունը: Այո, դա ունի թե քաղաքական նպատակ ու աստառ, թե շարունակություն»:
Տիկին Ալավերդյանը վստահեցնում է, որ դատավարությունը տեղի պետք է ունենա ՀՀ օրենսդրությամբ ու միևնույն ժամանակ հիշեցնում, որ «փախցնելու մեթոդը զինվորականների մեջ տարածված է:
Տիկին Ալավերդյանը ամփոփեց. «Մենք հայտնվել ենք մի հերթական ոչ թե սառը, այլ ավելի սառը ալիքի վրա»:
Տաթև ՀԱՐՈՒԹՅՈՒՆՅԱՆ
