Երեկ երեկոյան ժամը 21.00-ի սահմաններում Գյումրու Ռիժկովի ճեմափողոցից դեպի Շիրազի փողոց տանող հատվածում, որը քաղաքի ամենաբանուկ մասն է. այստեղ կան բազմաթիվ սպասարկման օբյեկտներ՝ խանութներ, սրճարաններ, դեղատներ վիճաբանություն է ծագել հայերի ու երկու հարբած ռուս զինվորականների միջև՝ սպանված Ավետիսյանների թեմայով, որը սակայն կանխել են ոստիկանները:
Ու չնայած ականատեսներ են եղել, թե ինչպես են ոստիկանները կարգ ու կանոն հաստատում, հանդարտեցնում են, զինվորականներին հեռացնում են , որպեսզի հետ պահեն ավելորդ լարվածությունից, այդուհանդերձ, չգիտես ինչու, ոստիկանությունը կատարվածը ընդհանրապես հերքում է, թե նման միջադեպ տեղի չի ունեցել:
Նկատենք, որ նման վիճաբանություններ, լեզվակռիվներ, ըստ գյումրեցիների, եղել են նաև 8-րդ զինվորական թաղամասի որոշ խանութներում, որտեղից առևտուր են անում ռուսները:
Ինչևէ, ականատեսներից մեկն անգամ հասցրել է լուսանկարել (տես լուսանկարը), թե ինչպես են մեր ոստիկանները ռուս զինվորականին նստեցնում մեքենա, որպեսզի վեճը հանկարծ շարունակություն չունենա, ավելորդ կրքեր կբորբոքվեն:
Կարդացեք նաև
Ականատեսներից մեկը պատմում է հետևյալը. «Ընկերոջս հետ, մեր համար ուրախ-ուրախ քայլում էինք Ռիժկովով, մեկ էլ փողոցի ծայրին` Տարտու խանութից ոչ հեռու տեսանք, որ լիքը մարդ կա հավաքված, մեկ էլ ոստիկանական ավտոներ երեւացին: Մարդկանց էինք տեսնում, կուտակում կար ու ոնց հասկացանք մի 15 հոգի միլիցա` հիմնականում քաղաքացիական հագուստով, ընդամենը երկուս-երեքն էին իրենց ֆորմայով: Ձայներ ու գոռգոռոցներ էինք լսում, մի քիչ ավելի մոտենալով` տեսանք, որ գրաժդանսկի հագած ոստիկանները քաշքշում են մի ռուս զինծառայողի ու սրան փորձում ոստիկանական 06 նստեցնել: Նստեցրին, բայց զինվորականը դիմադրում էր ու հաջողացրեց մի պահ ավտոյից դուրս գա, հետո էլի բռնեցին ու մտցրին ոստիկանական վիլիսը: Ասում են` զինվորականը հարբած է եղել, չգիտեմ` հնարավոր է, բայց ես էդպիսի բան չզգացի, շփոթված էր, լուռ ու ուզում էր փախներ: Ժողովրդի մեջ մի կին կար, չէր թողնում նստեցնեին մեքենան՝ գոռում էր՝ սինոկ, սինոկ անունդ ասա, ի վերջո դրան տարան, բազմությունը ցրվեց: Ոստիկանությունն ասում է էդպիսի բան չի եղել: Ոստիկանությունը գլուխը պատին ա տվել: Ի դեպ, ոստիկանները իրենց լավ չէին պահում: Երկու նկար կա` վատ որակով, որտեղ մի քիչ լավ նայելու դեպքում տեսանելի կլինի ոստիկանական մեքենան ու ոստիկանը, իսկ մյուսում` 06-ը»:
Շիրակի մարզի դատախազ Րաֆֆի Ասլանյանն Aravot.am-ին փոխանցեց, որ իր հանձնարարությամբ Շիրակի մարզի քննչական բաժնում նյութեր են նախապատրաստվում լրատվամիջոցների հրապարակումներում տեղ գտած տեղեկատվությունը ճշտելու, կհարցաքննվեն ականատեսներն ու լրատվամիջոցներին բացատրություն տված ոստիկանները: Դատախազը նաև ասաց, որ իրենք ստուգել են, ոստիկանության բաժիններ բերման ենթարկված անձիք չեն եղել, գրանցամատյաններում նշումներ չկան այս մասին: Ըստ դատախազի, նույնիսկ ականատեսների գրառումներում ու լրատվամիջոցների հրապարակումներում հանցագործության հատկանիշներ չեն երևում, այստեղ խոսվում է վիճաբանության մասին:
Մի խոսքով, չնայած ոստիկանությունը հերքում է, դատախազը հանձնարարել է նյութեր նախապատրասել ճշմարտությունը բացահայտելու համար:
Նունե ԱՐԵՎՇԱՏՅԱՆ
Կրակն են ընկել այդ մարդիկ ,որոնք ոչնչով մեղավոր չեն։Ինչու՞ պիտի պատասխան տան տականքի համար։Նույն կերպ էլ կվարվեն մեզ հետ դրսում ,ու մենք կբողոքենք,թե մենք ինչ ենք արել։