Պետական բյուջեի պակասուրդի ֆինանսավորման համար ՀՀ կառավարությունը որոշել է կրկին եվրապարտատոմսեր թողարկել: Կառավարության այսօրվա նիստում այս մասին ասաց ֆինանսների նախարար Գագիկ Խաչատրյանը:
Սակայն պարոն Խաչատրյանը նշեց, որ պետական պարտքի կառավարման գործառույթը չի սահմանափակվում միայն պարտատոմսերի տեղաբաշխմամբ: Ըստ նրա, հնարավոր ռիսկերը նվազեցնելու տեսանկյունից պակաս կարեւոր չէ նաեւ պարտավորությունների կառավարումը: Նախարարն ասաց, որ ՀՀ միջազգային իրավախորհրդատուի եւ գլխավոր տեղաբաշխողների խմբի հետ քննարկումների արդյունքներով պատրաստվել են մի շարք փաստաթղթեր: «Արտարժութային պարտատոմսերով գործառնությունների իրականացումը կախված է միջազգային կապիտալի շուկայի պայմաններից, սակայն այդ պայմանների նպաստավոր լինելու դեպքում, գործառնությունները հնարավոր են միայն այն դեպքում, երբ առկա են հավանության արժանացած անհրաժեշտ փաստաթղթերը եւ ՀՀ կառավարության կողմից առանձին փաստաթղթերի ստորագրման համար ՀՀ ֆինանսների նախարարությանը տրամադրված լիազորությունը»,-ասաց Գագիկ Խաչատրյանը:
Եվրապարտատոմսերի թողարկումը կառավարությունը կարեւորում է նաեւ այն տեսանկյունից, որ դա միջազգային կապիտալի շուկայում ՀՀ ներկայությունն ամրապնդում է:
Լուսինե ԲՈՒԴԱՂՅԱՆ
