2015 թվականի հունվար ամսին դեկտեմբեր ամսվա համեմատ արձանագրվել էր 2,5 տոկոս գնաճ, փետրվար ամսին տեղի է ունեցել 0,1 տոկոս գնանկում, մարտ ամսին գնանկումը կազմել է 0,1տոկոս: Ընդհանուր առմամբ 2014 թվականի դեկտեմբեր ամսվա համեմատ այս տարվա մարտ ամսին գրանցվել է 2,3 տոկոս գնաճ: Այս տեղեկություններն այսօր «Հենարան» ակումբում հայտնեց Ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը:
Ինչպես տեղեկացրեց բանախոսը՝ 0,1 տոկոս գնանկման պարագայում պարենային ապրանքների գնանկումը ավելի մեծ է եղել, եւ կազմել է 0,9 տոկոս: Ոչ պարենային ապրանքների գծով արձանագրվել 1,2 տոկոս գնաճ, իսկ ծառայությունների սակագները աճել են 0,2 տոկոսով. «Պարենային 13 ապրանքախմբերից տասում մարտ ամսին գնանկում է արձանագրվել եւ միայն երեք ապրանքային խմբում է արձանագրվել գնաճ՝ դրանք են հրուշակեղեն՝ 3,1 տոկոս, միրգ՝ 4,1 տոկոս եւ ոչ ոգելից խմիչք՝ 0,4 տոկոս: Առավելագույն գնանկումը արձանագրվել է ձկնամթերքի շուկայում՝ 4,3 տոկոս, ձվի գները նվազել են 2,1 տոկոսով, մսամթերքի գները՝ 0,8 տոկոսով»:
Ծառայությունների ոլորտում 0,2 տոկոս գնաճի ընդհանուր ֆոնին՝ 0,4 տոկոսով կրթության, բուժսպասարկման ոլորտում՝ 1,2 տոկոսով, հանգստի կազմակերպման ոլորտում՝ 1,2 տոկոսով, հանրային սննդի ոլորտում՝ 1,5 տոկոսով , մշակույթի ոլորտում՝ 2,3 տոկոսով, կենցաղային բնույթի ծառայությունների ոլորտում՝ 2,7 տոկոսով գնաճ է արձանագրվել:
Կապի ոլորտում 0,1 տոկոսով գնանկում է արձանագրվել:
Կարդացեք նաև
0,1 տոկոս գնանկման պարագայում Երեւանում արձանագրվել է 0,2 տոկոս գնաճ, Աշտարակում՝ 0,1 տոկոս, մյուս մարզկենտրոններում արձանագրվել 0,1-0,6 տոկոսով գնանկում: Առավել մեծ գնանկումները արձանագրվել են Վանաձոր, Իջեւան եւ Հրազդան քաղաքներում:
Էլյա ՀՈՎՀԱՆՆԻՍՅԱՆ
