Այսօր ԱՄՆ դեսպանատան մոտ ՀՅԴ Հայաստանի երիտասարդական միությունը եւ ՀՅԴ «Նիկոլ Աղբալյան» ուսանողական միությունը «Turkey still hides behind lies», «Recognition», «Միություն, պայքար, հաղթանակ» եւ այլ ցուցապաստառներով եւ «ար-դա-րու-թյուն» կոչերով ակցիա էր կազմակերպել ԱՄՆ դեսպանատան մոտ:
Ակցիայի մասնակիցները դեսպանատան առջեւ նստել էին եւ բռնել բերանները, ականջները` ցույց տալով, որ ԱՄՆ-ն լռում է, չի լսում իրենց եւ չի դատապարտում Թուրքիայի ոճրագործ արարքը` իրերը կոչելով իրենց անուններով:
Երիտասարդները պահանջագիր էին գրել ԱՄՆ կառավարությանը եւ Կոնգրեսին, որը հանձնեցին դեսպանատան ներկայացուցչին:
Կարդացեք նաև
Պահանջագրում նրանք հիշատակել էին ԱՄՆ այն բարձրաստիճան պաշտոնյաներին, նախագահներին, որոնք չեն վարանել քողազերծել Օսմանյան կայսրության կողմից մարդկության դեմ գործած այդ ոճրի վայրագությունը. «Ակնածանքով ենք նշում ԱՄՆ 28-րդ նախագահ Վուդրո Վիլսոնի խիզախությունը, որ պատերազմի ավարտին ստանձնեց ՀՀ սահմանների ճշտման առաքելությունը` մասնակի լուծում տալով հայ ժողովրդի պատմական, տարածքային իրավունքների վերականգնման խնդրին: Չնայած ԱՄՆ կառավարությունը 1951-ին եւ 1981-ին պաշտոնապես ընդունել է Ցեղասպանություն իրողությունը, իսկ Կոնգրեսը 1975 եւ 1987 թթ բանաձեւերով ճանաչել է Ցեղասպանությունը, վերջին տասնամյակներին ամերիկյան իշխանությունները տեղի են տալիս թուրքական սպառնալիքներին եւ դիմում են անպատվաբեր ինքնագրաքննության: Ոճիրից 1 դար հետո Թուրքիան տակավին չի զիջում եւ անամոթաբար համառորեն իրագործում է ցեղասպանության վերջին հանգրվանը` ժխտումը: Բարոյական հրամայական է, որ ԱՄՆ-ն անհապաղ հրաժարվի Թուրքիայի ժխտողական քաղաքականությանն իր առնչությունից»:
Ակցիայի մասնակիցները, որպես ցեղասպանությունը վերապրածների ժառանգներ, կոչ արեցին ԱՄՆ կառավարությանը եւ Կոնգրեսին 100-րդ տարելիցի նախօրյակին ճանաչել Ցեղասպանությունը եւ ճնշում բանեցնել Թուրքիայի վրա, որպեսզի ընդունի այն եւ ձեռնարկի միջոցներ նյութական եւ ոչ նյութական կորուստների հատուցման եւ հայ ժողովրդի տարածքային սեփականության վերականգնման ուղղությամբ:
Հռիփսիմե ՋԵԲԵՋՅԱՆ
