Այսօր Շուշիի ազատագրման օրվա կապակցությամբ Եռաբլուր պետք է այցելեին մի շարք բարձրաստիճան պաշտոնյաներ, երկրապահներ, այդ թվում՝ ՊՆ նախարար Սեյրան Օհանյանը:
Վաղ առավոտից Եռաբլուրում ռազմական ոստիկանության ներկայացուցիչները, զինվորականները շարքերով կանգնել էին՝ դիմավորելու նախարարին:
Ռազմական ոստիկանության ներկայացուցիչները սկսեցին Եռաբլուրի միջոցառումը լուսաբանելու եկած լրագրողների հետ վիճել եւ թելադրել, թե որտեղից կարող են լուսաբանել, որ կողմում կանգնել, որ քարին ոտքը դնել, որ քարին՝ ոչ, քանի քայլ աջ գնալ, քանի քայլ ձախ գնալ:
Կարդացեք նաև
Բանը հասավ նրան, որ կարգադրիչներից մեկը նետեց, թե լրագրողներն իրենց միջոցառումը տգեղացնում են՝ իրենց հագուկապով. «Գեղեցիկ չի, սա զինվորական ծառայություն է: Նորմալ շարված ենք, եկել եք ջինսով, ես շատ գիտեմ ինչով՝ գեղեցիկ չի՛»:
Մեր հարցին՝ ի՞նչ պիտի հագնեինք՝ համազգե՞ստ՝ նա պատասխանեց. «Դրա համար չենք ստիպում համազգեստ հագնեք, ասում ենք՝ կողքի կանգնեք, որ չերեւաք: Մենք գեղեցիկ հագնված ենք, տեսքը գցում եք»:
Մեր դիտարկմանը, որ մենք էլ ենք գեղեցիկ հագնված՝ ոստիկանը չհամաձայնեց. «Դա՝ ձեր կարծիքով»:
Հռիփսիմե ՋԵԲԵՋՅԱՆ
