«Parliamentmonitoring»-ն այսօր հարցազրույց է հրապարակել ՀԱԿ խմբակցության պատգամավոր Գագիկ Ջհանգիրյանի հետ: Ներկայացնում ենք հատված հարցազրույցից:
– Պարոն Ջհանգիրյան, չե՞ք նկատում, որ իշխանության առաջարկած սահմանադրական փոփոխությունների շուրջ քաղաքական ուժերի համախմբումը ստվարանում է: «Օրինաց երկիր» կուսակցությունը ներկայացրեց իր առաջարկությունները, մինչդեռ ոչ վաղ անցյալում մերժում էր սահմանադրական բարեփոխումների գործընթացը: ՀՅԴ-ն ավելի վաղ էր ներկայացրել իր առաջարկությունները:
– Ես չեմ տեսնում այդ համախմբումը, ավելի շատ անորոշություն եմ տեսնում: ՀՅԴ-ն ի սկզբանե կողմ էր այդ փոփոխություններին, և այդ կուսակցության դիրքորոշման մեջ որևէ փոփոխություն չեմ տեսնում: Հակառակը, ՀՅԴ գործիչների արտահայտություններում տեսնում եմ մտավախություն, որ այնքան էլ վստահ չեն, թե այդ փոփոխությունները կարող են ընթանալ պառլամենտական համակարգի ներդրման ուղղությամբ:
– «Բարգավաճ Հայաստան» կուսակցությունն էլ այդ փոփոխությունների դեմ նախկին էնտուզիազմով չի պայքարում:
Կարդացեք նաև
– ԲՀԿ-ն նախկին ԲՀԿ-ն չէ, որ ես հիմա այդ կուսակցության դիրքորոշումը համեմատեմ իր նախկին դիրքորոշման հետ: Ձեր կարծիքով ՝ նո՞ւյնն է:
– Պարզապես ԱԺ փոխնախագահ Էդուարդ Շարմազանովն էր հայտարարել , թե այն հանգամանքը, որ մարտի 12-ին 7 կուսակցություններ Բաղրամյան 26-ում հանդիպել են Սերժ Սարգսյանի հետ, արդեն համախմբում է:
– Ես չեմ կարող այդպիսի բան ասել: ՕԵԿ-ը թեև ինչ-որ առաջարկություններ է ներկայացրել, բայց կրկին կիսանախագահական կառավարման մոդելի կողմնակից է: ԲՀԿ-ից էլ նախկին անունն է մնացել:
– Ամեն դեպքում սահմանադրական փոփոխությունների նկատմամբ նախկին դիմադրությունը կոտրվել է:
– Իշխանական այդ ողջ օպերացիայի իմաստն այն էր, որ միասնական ճակատը քանդվեր:
– Փաստորեն իշխանություններն այժմ կարող են ավելի վստահ քայլերով գնալ դեպի այդ փոփոխությունները:
– Ես այդպես չեմ կարծում: Պառլամենտական կառավարման համակարգը, եթե նույնիսկ նախընտրելի է իշխող քաղաքական ուժի համար, միևնույնն է, մեծ վերապահումներ ունի: Այն Հայաստանի, այսօրվա մեր ռեալ քաղաքական, աշխարհագրական իրավիճակի համար և Եվրասիական տնտեսական միությանն անդամակցելու, Լեռնային Ղարաբաղի հակամարտության և վտանգի առկայության պայմաններում խիստ ռիսկային որոշում կլինի:
Հնչած տեսակետների վերաբերյալ «Առաջին լրատվական»-ը հրապարակել է ԲՀԿ մամլո խոսնակ Վահան Բաբայանի մեկնաբանությունը. «Նախ՝ սահմանադրական փոփոխությունների մասով. մեր դիրքորոշումը մնացել է անփոփոխ, և մենք այն քանիցս հաստատել ենք։ Ինչ վերաբերում է պարոն Ջհանգիրյանի հնչեցրած գնահատականին, ապա մենք այն համարում ենք առնվազն խիստ անկոռեկտ։ Մենք բոլոր քաղաքական ուժերի հանդեպ ունենք հարգալից վերաբերմունք և միշտ պատրաստ ենք ընդհանուր հետաքրքրություն ներկայացնող հարցերի շուրջ համագործակության։ Սակայն ցանկացած անհարգալից և ոչ կոռեկտ ձևակերպում, բնականաբար, պատասխան պիտի ստանա։
Մենք ակնկալում ենք, որ ՀԱԿ պատասխանատուներն այս հարցին կանդրադառնան։ Չնայած՝ հանրությունը, կարծում եմ, հրաշալի գիտի, թե որ քաղաքական ուժից ինչ է մնացել, և որ քաղաքական ուժն ընդհանրապես գոյություն ուներ թե ոչ, ու եթե ուներ՝ ում հաշվին»:
