Այս տարի առաջին անգամ համայնքների խոշորացման հարցով ՀՀ 22 համայնքներում անցկացվեց տեղական հանրաքվե:
«Մեդիա կենտրոնում» հրավիրված քննարկմանը ԿԸՀ-ի և դիտորդական առաքելությունների ներկայացուցիչները ամփոփեցին հանրաքվեի արդյունքները:
ՀՀ Կենտրոնական ընտրական հանձնաժողովի անդամ Նունե Հովհաննիսյանը անցկացման կարգի հետ կապված հայտարարեց. «Տեղամասային ընտրական հանձնաժողովների գրանցամատյանում որևէ գրառում քվեարկության կարգի խախտման մասին արձանագրված չէ»:
«Ընտրական համակարգեր կենտրոն» ՀԿ-ի ղեկավար Վահրամ Վարդանյանը մտահոգություն հայտնեց, թե ԶԼՄ-ների, ՀԿ-ների ու քաղաքական կուսակցությունների պասիվության պատճառով այս հանրաքվեն անցավ ոչ մրցակցային պայմաններում: Այնուհետև բարձրաձայնեց մի շարք խախտումների մասին. «Դիտորդական առաքելություն իրականացրել ենք սեփական ֆինանսական միջոցներով և կամավորական ուժով, դրա համար էլ միայն երեքում` Դիլիջանի մշակույթի պալատում, Թեղուտ համայնքում և Հաղարծինի համայնքային կենտրոնում: Մինչև բուն քվեարկության օրը պետական իշխանությունների ներկայացուցիչները պտտվում էին մարզերով և քարոզչական գործունեություն իրականացնում, ինչը ՀՀ օրենքով արգելվում է: Միջազգային դոնոր կազմակերպությունների ներկայացուցիչները ևս պտտվում էին և խոստումներ տալիս, թե քվեարկեք կողմ և կիրականացնենք այս կամ այն ծրագիրը կառավարության հետ ձեր համայնքում: Ընտրատեղամասերից դուրս մարդկային կուտակումներ կային, ինչը մտահոգություն է առաջացնում, որ մարդկանց ուղղակի բերել են»:
Կարդացեք նաև
Վահրամ Վարդանյանը նաև հայտարարեց, որ Թեղուտի ընտրատեղամասերում ընտրաթերթիկի կորուստ է գրանցվել, ինչն ունի «կարուսելի ռիսկ»:
ՀՀ Կենտրոնական ընտրական հանձնաժողովի իրավաբանական վարչության պետ
Լիլիա Հակոբյանը, ի հեճուկս այս մտահոգությունների, պնդեց, թե «ՀՀ-ում տեղի է ունեցել ժողովրդավարական գործընթացներից մեկը` տեղական հանրաքվեն, որը 2005-ին բարձրացրել ենք սահմանադրական մակարդակի: Սա մեր առաջին փորձն էր: Մենք տեղական բնակչությանը տեղական նշանակության հարցերի մասնակից ենք դարձնում»:
Տաթև ՀԱՐՈՒԹՅՈՒՆՅԱՆ
Լուսանկարը` Մեդիա կենտրոնի
