«Իրազեկ և պաշտպանված սպառող» ՀԿ նախագահ Բաբկեն Պիպոյանը մանկապարտեզներում թունավորման դեպքերը կանխելու համար առաջարկում է երեխաների ծնողներին դարձնել տեսուչներ, նրանց տալ վերահսկողական լծակներ:
«Որովհետեւ մանկապարտեզ ամեն օր գնում է միայն ծնողը: Բայց ծնողը, որ գնում է մանկապարտեզ, պետք է ունենա ամբողջական տեղեկատվություն՝ որ օրը ինչ մթերք է մատակարարվում»,- այսօր «Հայացք» ակումբում ասաց փորձագետը:
Նա հիշեց Եղվարդի մանկապարտեզում թունավորման դեպքերը ու ասաց, որ մանկապարտեզում նրբերշիկ ու երշիկ մատակարարելը չի թույլատրվում. «Քանի՞ ծնող գիտեր այս մասին մինչեւ Եղվարդի դեպքը, շատ քչերը: Ծնողը գնում է մանկապարտեզ, տեսնում է՝ x ընկերության երշիկն է մատակարարվել, ասում է՝ դե մենք էլ ենք տանը սրանից ուտում, լավ է: Չէ, լավ չէ, չի թույլատրվում»:
Նա հիշեց նաեւ Նորքում գտնվող մանկապարտեզում անցած տարի տեղի ունեցած թունավորման դեպքերը. «Եթե այդ դեպքից հետո պատասխանատուները պատժվեին ու հետեւեին մեխանիզմներին, մենք թունավորման այս մասսայականացումը չէինք ունենա: Բայց Եղվարդի մանկապարտեզի դեպքից հետո քիչ ծնողներ էին բողոքում, որովհետեւ ասում էին երեխուս տանելու տեղ չունեմ: Չինովնիկը պետք է պատասխանատվության ենթարկվի, իսկ ինչո՞ւ չի ենթարկվում:
Կարդացեք նաև
Չեն ներդրվում համակարգերը, որոնք կանխեն նման դեպքերը: Կրկնում եմ՝ լծակները տվեք ծնողին, որ վերահսկի, ծնողին վերածեք տեսուչի»:
Փորձագետը հարցադրումներ էլ ներկայացրեց՝ քանի՞ մթերքի մոնիտորինգ է արվել, ունե՞ք տեղեկատվություն, որ այսքան ընկերություն պետք է մանկապարտեզներին մթերք մատակարարի. «Ոչ, ոչ, ոչ, չունենք:
Ու հետո պետք է զարմանա՞նք թունավորումից»:
Արփինե ՍԻՄՈՆՅԱՆ
