Շիրակի մարզի ընդհանուր իրավասության դատարանում, որտեղ շարունակվում էր դատապարտյալ Հարություն Սարգսյանի հայցի քննությունն ընդդեմ նախկին քաղաքապետ Վարդան Ղուկասյանի, նրա գրասենյակի, երրորդ անձ ճանաչված «Առավոտի», «Պանարամա Էյ Էմ» եւ Անժելա Թովմասյանի, միջնորդությամբ հանդես է եկել դատապարտյալը:
Հիշեցնենք, որ լրատվամիջոցները Կարեն Եսայանի սպանության գործով դատավարության փուլում տպագրել էին նախկին քաղաքապետի գրասենյակի հայտարարությունը: Տվյալ գործով քաղաքապետը եղել է դատավարության կողմերից մեկը՝ տուժողի կարգավիճակով:
Դատապարտյալը միջնորդել է, որպեսզի կասեցվի այս գործի քննությունը:
Նա դատարանին է ներկայացրել Տեղեկատվական վեճերի խորհրդի եզրակացությունը, որը վերաբերվել է մեկ այլ լրատվամիջոցի՝ «Ցայգ» հեռուստաընկերությանը, որի դեմ դարձյալ առկա էր դատական վեճ, դատապարտյալը պահանջում է «Ցայգից» հրապարակային ներողություն խնդրել եւ փոխհատուցել 300 000 դրամի չափով պատվին եւ արժանապատվությանը հասցված վնասը:
Կարդացեք նաև
Ըստ ՏՎԽ-ի եզրահանգման, անմեղության կանխավարկածի պաշտպանության համար «օրինական կարող է համարվել մեղադրյալ Գեւորգ Հայրապետյանի կողմից հարուցված քաղաքացիական գործի ճակատագիրը»:
Խոսքը «Կենտրոն» հեռուստատեսության եւ Գեւորգ Հայրապետյանի միջեւ ծագած հայտնի վեճի մասին էր, որը մենք լուսաբանել ենք. հեռուստաընկերությունը պարտվել է այդ գործով:
Դատապարտյալը դատարանին ներկայացրել էր ՏՎԽ եզրահանգման այն հատվածը, համաձայն որի, հեռուստաընկերությունը խախտել է հայցվոր դատապարտյալի անմեղության կանխավարկածը. «կատարելով մեղքի մասին հրապարակային հայտարարություն այնպիսի պայմաններում, երբ հայտարարության կատարման պահին Հարություն Սարգսյանի մեղքը ապացուցված չէր օրինական ուժի մեջ մտած դատավճռով»:
Սակայն ՀՀ քաղաքացիական օրենսգրքի 1087.1 հոդվածը, ըստ դատապարտյալի, կարող է չհանդիսանալ անմեղության կանխավարկածի սահմանադրական իրավունքի խախտումից պաշտպանվելու արդյունավետ միջոց, իսկ ՀՀ օրենսդրությամբ որեւէ այլ միջոց սահմանված չէ:
Լուծումն ակնկալվում է Սահմանադրական դատարանից:
Ռուզան ՄԻՆԱՍՅԱՆ
