Արդեն տեղեկացրել էինք, որ Քաշաթաղի շրջանի Թովմասարի սարահարթի հարևանությամբ Հադրութի տարածքում հունիսի 13-ն բռնկված հրդեհը գիշերը հաջողվել էր շիջել Քաշաթաղի շրջանի հարավային թևի համայնքների կամավորների և Իշխանաձորում գործող հակահրդեհային շտաբի հերթապահություն իրականացնող տղաների շնորհիվ` մինչև կրակի` ցանքատարածքներին հասնելը: Սակայն կեսօրին նորից տագնապ հնչեց. նույն տարածքում բռնկվել էր ավելի մեծ չափերով հրդեհ, իսկ արևելքից փչող քամին բորբոքում էր կրակը: Ցանքատարածքների եզրերին և առհասարակ տարածքում աճած փուշը չորացել է և դարձել դյուրավառ:
Վառվող փշերի կրակի սյունը հասնում էր մի քանի մետրի, իսկ ծուխը խեղդում էր հրդեհաշիջման մասնակիցներին:
Սկզբում հիմնականում շրջանի հյուսիսային թևի համայնքների կամավորականներն էին և 1 մարտական հաշվարկ. Տիգրանավանի ՀՓՋ տղաներն էին: Շրջվարչակազմի ղեկավար Սուրեն Խաչատրյանի ղեկավարությամբ պայքարում էինք կրակի դեմ: Այստեղ էին նաև ԼՂՀ գյուղատնտեսության նախարար Անդրանիկ Խաչատրյանը: Շրջվարչակազմի ղեկավարի և աշխատակազմի գյուղվարչության պետ Լևոն Սիմոնյանի հետ շրջեցինք տարածքում` ճշտելու, թե որտեղ է հարմար կրակի դեմն առնելու համար:
Կարդացեք նաև
Երկրորդ անգամ տարածք ժամանեց ԼՂՀ վարչապետ Արայիկ Հարությունյանը: Ողջ օրը տարբեր վայրերում շարունակվեց պայքարը կրակի դեմ, սակայն քամին ու չոր խոտը համագործակցում էին և կրակն առաջանում էր դեպի ցանքատարածքներ: Հրդեհի դեմ պայքարում ներգրավվեցին նաև գութանավոր տրակտորները, կոմբայնները, սակայն չարիքը հասավ հասուն արտերին, ու վառվեցին հնձի պատրաստ հասկերը:
Մի պահ թվաց` ամեն ինչ վերջացավ. անհնար է պայքարել կրակի դեմ, որը բորբոքվում էր անընդհատ փչող քամուց: Օգնության հասան նաև հարավային թևի համայնքների կամավորները, սահմանապահ ջոկատի զինվորները: Համատեղ ջանքերով/մոտ 600 հոգի/ հաջողվեց վերջապես հաղթել նաև ամենազոր կրակին: Հրդեհը տեղայնացվեց. կարևորը, որ վերացավ տարածվելու վտանգը:
Գիշերը դարձյալ մոտ 100 կամավորներ ցանքատարածքներում էին: Շրջվարչակազմի ղեկավարը տեղեկացրեց, որ նախնական տվյալներով այրվել է 20-25հա ցանքատարածք` գարի և ցորեն, որոնց մի մասը պատկանում է ԼՂՀ գյուղի և գյուղատնտեսության աջակցության հիմնադրամին, մի մասը` վարձակալներին:
Այս պահի դրությամբ շրջանի գրեթե բոլոր համայնքներից կամավորները տարածքի տարբեր կետերում հերթապահում են: Տարածքում են նաև ԼՂՀ ԱԻԾ տնօրեն Արթուր Հարությունյանը, գյուղատնտեսության նախարար Անդրանիկ Խաչատրյանը: Բացի այդ ՀՀ տարբեր մարզերից օգնության են եկել հրշեջ խմբեր: Բերքահավաքը շարունակվում է:
Զոհրաբ ԸՌՔՈՅԱՆ
Թովմասարից
