Վահանների վրա թխթխկացնելով՝ ոստիկանության ներքին զորքերն աստիճանաբար առաջ են շարժվում Բաղրամյան պողոտայով:
Հավաքվածները չեն նահանջում, վանկարկում են «հաղթանակ»:
ԱԺ պատգամավոր Նիկոլ Փաշինյանը զրուցում է ՀՀ փոխոստիկանապետ Հունան Պողոսյանի հետ՝ հիշեցնելով հավաքների ազատության մասին օրենքի դրույթները:
«Բռնությունն անթույլատրելի է»,- ասաց Նիկոլ Փաշինյանը: «Գնացեք այնտեղից հանեք խառնակիչներին՝ «Հիմնադիր խորհրդարանին» եւ Արգիշտի Կիվիրյանին,- պատասխանեց Հունան Պողոսյանը:- Մե՞նք ենք ուզում բռնություն: Ուզում են Ժիրայր Սեֆիլյանը, Արգիշտի Կիվիրյանը: Կանխեք, մենք ոչ մի գործողության չենք դիմի»:
Կարդացեք նաև
«Դուք բարձրախոսոով ողջամիտ ժամկետ չտվեցիք»,- նաեւ նկատեց Նիկոլ Փաշինյանը: «Կտանք»,- խոստացավ Երեւանի փոխոստիկանապետ Վալերի Օսիպյանը:
Կենդանի պատին մաս կազմող Սասուն Միքայելյանը, Էդմոն Մարուքյանը, Ստեփան Գրիգորյանը, Միքայել Դանիելյանը, Մովսես Շահվերդյանը, Մանվել Եղիազարյանը, Գառնիկ Իսագուլյանը, Արամ Աբրահամյանը, Պետրոս Ղազարյանը եւ այլք շղթա են կազմել ոստիկանական զորքի առջեւ:
«Ճոռոմ, ճոռոմ հայրենասիրությունից խոսող պատգամավորները թող գան ստեղ»,- ասաց Ստեփան Գրիգորյանը:
Կենդանի պատին միացան նաեւ հոգեւորականներ:
