«Կարին» ազգագրական երգի ու պարի անսամբլի ղեկավար Գագիկ Գինոսյանը հունիսի 23-ին Բաղրամյան պողոտայի դեպքերով երկու ցուցմունք է տվել: Մեկը՝ որպես վկա, մյուսը՝ որպես տուժող:
Նրան այդ օրը բերման էին ենթարկել Նաիրի կինոթատրոնի մոտից:
«Տեսա՝ ինչպես էին օպերայի նվագախմբի մենակատարին փորձում ձեռքերը շատ կոպիտ ոլորելով ձերբակալել, ձայները լսելով՝ դիմացի փողոցն անցել եմ ու խնդրել՝ ավելի մեղմ վերաբերել:
Ի պատասխան ինձ էլ են ձերբակալել»,- պատմեց Գագիկ Գինոսյանը:
Կարդացեք նաև
Նրա խոսքով, իրեն ոստիկանություն տանելիս ոստիկանները չեն բացատրել ինչու ու ուր են տանում, իսկ սահմանված երեք ժամի փոխարեն էլ իրեն տասնմեկ ժամ են պահել ոստիկանական բաժնում. «Եվ ոչ միայն ինձ: Առանց սանկցիա ու բացատրություն տալու տասնմեկ ժամ պահեցին, հետո ապօրինաբար տարան նարկոդիսպանսեր՝ հետազոտվելու, բժշկական զննում են արել, արդյոք թմրանյութ օգտագործել ենք, թե՝ ոչ: Դրա պատասխանն էլ չգիտենք»:
Նա ասաց, որ ցուցմունքից հետո որեւէ տեղեկություն գործի վերաբերյալ չունի, մեր հարցին՝ հետեւողական լինելու եք ապօրինի գործողություններ կատարած ոստիկաններին պատժելու պահանջով, ասաց. «Դե որ գնացել ու ցուցմունք եմ տվել, արդեն ինչ-որ բան ասում է, այն որ պահանջել եմ ու ցուցմունքի մեջ էլ գրել եմ, որ ոչ թե ի գիտություն եմ ասում, այլ պահանջում եմ, որ մեղավորները պատժվեն, որ նման իրադրություններ այլեւս չկրկնվեն»:
Մեր հարցին՝ ինչ եք կարծում, հետաքննության արդյունքում կհաստատվի՞, որ ոստիկաններ են եղել այդ օրը, որոնք ապօրինի գործողություններ են կատարել, ասաց. «Կարծում եմ, այնուամենայնիվ, ինչ-որ բան պետք է լինի, ի վերջո, ինչ-որ մի բան պետք է հրամցնեն ժողովրդին՝ ինչ է կատարվել այդ օրը: Եթե ապացուցեն, որ ոստիկաններն իրավասու էին նման գործողություններ կատարել, պետք է ցույց տան մեղավորներին ցուցարարների մեջից, եթե իրավասու չէին, ապա պետք է ցույց տան, թե ովքեր են իրենց լիազորությունները չարաշահել: Սա հանրային հնչեղություն ունեցող գործ է»:
Արփինե ՍԻՄՈՆՅԱՆ
