Արդյո՞ք Սահմանադրության փոփոխությունների չանցնելը նշանակում է, որ Սերժ Սարգսյանը չի կարողանա վերարտադրվել։
Թեման խորությամբ հասկանալու համար եկեք տեսնենք, թե ինչ է ասել ինքը՝ Սերժ Սարգսյանը այդ կապակցությամբ. «Պաշտոնապես հայտարարում եմ, որ ես՝ Սերժ Սարգսյանս, այլեւս երբեք չեմ առաջադրվելու Հայաստանի Հանրապետության նախագահի պաշտոնի համար։ Եթե վերջնական քննարկումների արդյունքում իմ ցանկությանը չհամապատասխանող ուղի ընտրվի, նկատի ունեմ պառլամենտական կառավարման մոդելը, ապա ես չեմ հավակնի նաեւ վարչապետի պաշտոնին»,- ասել է նա 2014 թվականի ապրիլի 10-ին ՝ սահմանադրական բարեփոխումների մասնագիտական հանձնաժողովի անդամների հետ հանդիպման ժամանակ։
Ի՞նչ է սա նշանակում։ Նշանակում է, որ եթե նոր Սահմանադրությունը չանցնի եւ մնա հին Սահմանադրությունը, Սերժ Սարգսյանը կարող է հավակնել ՀՀ վարչապետի պաշտոնին, որովհետեւ նա ասում է, որ որեւէ պարագայում չի հավակնի նախագահի պաշտոնին, իսկ վարչապետի պաշտոնին չի հավակնի միայն խորհրդարանական կառավարման մոդելում։ Ըստ այդմ՝ գործող կառավարման մոդելում կհավակնի վարչապետի պաշտոնին։
Այն քաղաքական ուժերի եւ քաղաքական գործիչների համար, ովքեր գործող Սահմանադրությունը կարդալու առիթ չեն ունեցել, ասենք, որ գործող Սահմանադրությամբ խորհրդարանական մեծամասնությանը տիրապետող, այն կառավարելու ընդունակ վարչապետը շատ ավելի ուժեղ դեմք է, քան նախագահը։ Այսինքն՝ եթե Սահմանադրությունը պահպանվի եւ Սերժ Սարգսյանի ՀՀԿ-ն խորհրդարանական մեծամասնություն ունենա եւ Սերժ Սարգսյանը 2018-ին նախագահական ընտրություններից հետո դառնա վարչապետ, այսօրվա իշխանությունից պակաս իշխանություն չի ունենա։
Կարդացեք նաև
Բայց եթե Սահմանադրությունը փոխվի եւ անցում կատարվի խորհրդարանական կառավարման մոդելին եւ Սերժ Սարգսյանի ղեկավարած ՀՀԿ-ն հաղթի խորհրդարանական ընտրություններում եւ Սերժ Սարգսյանը լինի ԱԺ նախագահ եւ ՀՀԿ նախագահ, նույնքան իշխանություն կունենա այդ պարագայում նույնպես։
Եթե այս տրամաբանությունն ենք դնում իրավիճակի գնահատման հիմքում, հասկանալի է դառնում, որ խնդիրը ոչ թե Սահմանադրությունն է, այլ այնպիսի քաղաքական ընդդիմության ձեւավորումը, որը ի վիճակի կլինի վերցնել իշխանությունը ՀՀԿ-ից։ Իսկ հիմա Հայաստանում նման քաղաքական ուժ չկա, գոյություն չունի, եւ Սերժ Սարգսյանի վերարտադրությունն ապահովողը այս փաստն է եւ ոչ թե Սահմանադրության այս կամ այն տարբերակը։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
